તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
એમ્બ્યુલન્સમાં પેટ્રોલ ખતમ થઈ ગયું: પેશન્ટ રસ્તામાં જ મરી ગયો
બિહારના જમુઈમાં એક એમ્બ્યુલન્સ ચાલકની લાપરવાહીએ દરદીનો જીવ લીધો
જમુઈ,તા.૨૭: બિહારના જમુઈમાં એક ઍમ્બ્યુલન્સચાલકની લાપરવાહીએ દરદીનો જીવ લીધો હતો. ઍમ્બ્યુલન્સમાં જમુઈની સિવિલ હોસ્પિટલમાંથી અતિ ગંભીર દરદીને પટનાની મોટી હોસ્પિટલમાં લઈ જવામાં આવી રહ્યો હતો. ધીરજ રવિદાસ નામના ભાઈ બે દિવસ પહેલાં અચાનક માંદા પડ્યા હતા. દીકરા અજિતે તેમને લઈને ઝાઝા ગામમાં પ્રાથમિક ઉપચાર કરાવ્યો, પણ ત્યાં ફરક ન પડ્યો. વધુ ટેસ્ટ કરતાં ખબર પડી કે મગજમાં ક્લોટ થઈ જવાને કારણે હાલત ગંભીર છે. દરદીને તાત્કાલિક મોટી હોસ્પિટલમાં લઈ જવાની તાકીદ કરવામાં આવી. બપોરે એક વાગ્યે જમુઈથી ઍમ્બ્યુલન્સ પટના જવા નીકળી. એ દરમ્યાન ઍમ્બ્યુલન્સના ડ્રાઇવરે ૧૦૦ રૂપિયાનું પેટ્રોલ ભરાવ્યું હતું. જોકે પોણાબે વાગ્યે એક સૂમસામ વિસ્તાર પાસે ઍમ્બ્યુલન્સનું પેટ્રોલ ખતમ થઈ ગયું. પેટ્રોલ ખતમ થઈ જતાં ઍરકન્ડિશન પણ બંધ થઈ ગયું. ડ્રાઇવરે કોઈકની પાસે પેટ્રોલ મગાવ્યું હતું, પણ ત્યાં સુધી ભીષણ ગરમીમાં રોડની વચ્ચે તાપમાં બે કલાક સુધી દરદી તડપ્યો અને આખરે દમ તોડી દીધો. મૃત્યુ પામનાર દરદીના પરિવારજનો ઍમ્બ્યુલન્સની બેદરકારી માટે ગુસ્સામાં છે, જ્યારે ઍમ્બ્યુલન્સ કંપનીનું કહેવું છે કે ડ્રાઇવર પેટ્રોલ ભરાવવા માગતો હતો પણ પેટ્રોલ-પમ્પ પર પૂરતું પેટ્રોલ હતું નહીં.
(10:45 AM IST)
છેલ્લા 8 દિવસમાં સૌથી લોકપ્રિય 
