મુંબઈ, તા.21: અમેરિકાના વિદેશ મંત્રી (સેક્રેટરી ઓફ સ્ટેટ) માર્કો રૂબિયો હાલ ભારતની ત્રણ દિવસીય સત્તાવાર મુલાકાતે છે. મંગળવારે મુંબઈમાં ભારતના વિદેશ મંત્રી એસ. જયશંકર સાથેની મહત્વપૂર્ણ મુલાકાત દરમિયાન તેમણે ભારત અને અમેરિકા વચ્ચેના દ્વિપક્ષીય સંબંધોને લઈને એક મોટું અને સ્પષ્ટ નિવેદન આપ્યું છે. રૂબિયોએ ભારપૂર્વક જણાવ્યું છે કે પાકિસ્તાન અથવા દુનિયાના અન્ય કોઈપણ દેશ સાથે અમેરિકાના સંબંધો ક્યારેય પણ ભારતના રાષ્ટ્રીય હિતોના ભોગે રાખવામાં આવશે નહીં.

અમેરિકા અને ઇસ્લામાબાદ વચ્ચે વધી રહેલા સંબંધો અંગેના પ્રશ્નના જવાબમાં રૂબિયોએ સ્પષ્ટતા કરી હતી કે અમેરિકા ભારત સાથેના પોતાના ગાઢ સંબંધોને અન્ય કોઈ પણ દેશ સાથેના સંબંધોની સ્પર્ધા તરીકે જોતું નથી. જોકે, તેમણે એમ પણ ઉમેર્યું હતું કે વિવિધ દેશો સાથે સંબંધોને સંતુલિત રાખવા એ અમેરિકન વિદેશ નીતિનો એક પડકારજનક પરંતુ આવશ્યક ભાગ છે, અને પાકિસ્તાન જેવા દેશો સાથેના સંબંધોનો ઉપયોગ સંભવિત સંઘર્ષોને રોકવા તેમજ ક્ષેત્રીય તણાવ ઘટાડવા માટે થઈ શકે છે.

મુંબઈમાં યોજાયેલા 'ફ્રીડમ ૨૫૦' સ્વાગત સમારોહને સંબોધતા રૂબિયોએ સોશિયલ મીડિયા પર પણ જણાવ્યું હતું કે અમેરિકા અને ભારત સ્વતંત્રતા, નવીનતા અને શાંતિના સહિયારા સિદ્ધાંતો પર આગળ વધી રહ્યા છે. ભારત અને અમેરિકા વચ્ચે ચાલી રહેલી દ્વિપક્ષીય ટ્રેડ ડીલ વિશે વાત કરતા તેમણે ખુલાસો કર્યો કે હાલ આ વ્યાપાર કરાર તેના અંતિમ તબક્કામાં પહોંચી ગયો છે અને ટૂંક સમયમાં જ તેને આખરી સ્વરૂપ આપવામાં આવશે.

પોતાના આ પ્રવાસ દરમિયાન માર્કો રૂબિયો આજે જામનગરની મુલાકાતે છે. જામનગર સ્થિત રિલાયન્સ ઇન્ડસ્ટ્રીઝની વિશાળ રિફાઇનરીની મુલાકાત લઈને તેઓ ઉદ્યોગપતિ મુકેશ અંબાણી સાથે વેપાર, ઊર્જા સહયોગ અને ક્રૂડ ઓઇલ સંબંધિત મહત્વપૂર્ણ મુદ્દાઓ પર ઊંડી ચર્ચા કરશે. જામનગર પ્રશાસન દ્વારા તેમની મુલાકાતને લઈને અત્યંત કડક સુરક્ષા વ્યવસ્થા ગોઠવવામાં આવી છે.

અગાઉ મુંબઈમાં વિદેશ મંત્રી એસ. જયશંકર સાથે થયેલી બેઠકમાં બંને નેતાઓએ વેપાર, ટેક્નોલોજી, સંરક્ષણ અને ઊર્જા ક્ષેત્રે સહયોગ વધારવા અંગે વિસ્તૃત મંથન કર્યું હતું. રૂબિયોએ ભારતને અમેરિકન ટેક્નોલોજી અને અદ્યતન સંરક્ષણ પ્રણાલીઓની ખરીદી વધારવા તેમજ ઉર્જા વેપારને વધુ વેગ આપવા માટે વિશેષ અનુરોધ કર્યો છે, જે ભવિષ્યમાં ભારત-અમેરિકાની વ્યૂહાત્મક ભાગીદારીને નવી ઊંચાઈઓ પર લઈ જશે.