<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 17th November 2026

યુરોપ જતા અમેરિકનોને તહેવારો દરમિયાન ભીડવાળાં સ્થળોએ સતર્ક રહેવાની સલાહ: આતંકી અને ગુનાહિત પ્રવૃત્તિની શક્યતા

સ્પેનમાં મેડ્રિડ દૂતાવાસે બજારો, પ્રવાસન કેન્દ્રો અને ધાર્મિક સ્થળો અંગે ચેતવ્યા, સ્થાનિક સૂચનાઓનું પાલન કરવા તથા મુસાફરીમાં સંભવિત વિક્ષેપ માટે તૈયાર રહેવા જણાવ્યું, સુરક્ષા અંગે સાવચેતી રાખવાનો આગ્રહ

મેડ્રિડ, તા. ૧૭: સ્પેનના મેડ્રિડ સ્થિત અમેરિકન દૂતાવાસે તહેવારોની મોસમમાં યુરોપનો પ્રવાસ કરતા અમેરિકન નાગરિકો માટે સુરક્ષા સૂચના બહાર પાડી છે. ૧૬ નવેમ્બરની સૂચનામાં ક્રિસમસ બજારો, પ્રવાસન સ્થળો, પરિવહન કેન્દ્રો, શોપિંગ મોલ અને પ્રાર્થનાસ્થળો જેવા ભીડવાળા વિસ્તારોમાં સતર્ક રહેવા જણાવાયું છે.

દૂતાવાસે જણાવ્યું છે કે મોટા મેળાવડા અને જાહેર કાર્યક્રમો આતંકવાદી જૂથો કે ગુનેગારોનું નિશાન બની શકે છે. એકલા હુમલાખોર સહિતનાં તત્ત્વો અગાઉથી સ્પષ્ટ ચેતવણી વિના હુમલો કરી શકે તેવી શક્યતા ધ્યાનમાં રાખીને સાવચેતી સૂચવાઈ છે. આ સૂચના કોઈ ચોક્કસ હુમલો નિશ્ચિત થયો હોવાની જાહેરાત નથી.

 

યુરોપમાં હડતાલો અને દેખાવોને કારણે પરિવહન તથા રોજિંદી પ્રવૃત્તિઓમાં વિક્ષેપ પડી શકે છે. નવેમ્બરમાં વિવિધ દેશોમાં વિમાનસેવાને મળેલી ખોટી બોમ્બધમકીઓનો પણ ઉલ્લેખ કરાયો છે. પ્રવાસીઓને સ્થાનિક સમાચાર અને પોલીસની સૂચનાઓ અનુસરવા, દેખાવોથી દૂર રહેવા, કિંમતી વસ્તુઓ સાચવવા તથા પરિવારને પ્રવાસની જાણ રાખવા કહેવાયું છે. સુરક્ષા અપડેટ મેળવવા અમેરિકન નાગરિકોને સંબંધિત પ્રવાસી નોંધણી યોજનામાં જોડાવાની સલાહ અપાઈ છે. 

 

(9:43 AM IST)