વોશિંગ્ટન: મધ્ય-પૂર્વમાં ઈરાન સાથે વધતા જતા તણાવને જોતા ટ્રમ્પ પ્રશાસને એક અત્યંત મહત્વપૂર્ણ વ્યૂહાત્મક નિર્ણય લીધો છે. યુએસ સ્ટેટ ડિપાર્ટમેન્ટે શુક્રવારે ઈઝરાયલ, કતાર, યુએઈ અને કુવૈતને ૮.૬ બિલિયન ડોલરથી વધુના અત્યાધુનિક શસ્ત્રો વેચવાની મંજૂરી આપી દીધી છે. અમેરિકી વિદેશ મંત્રી માર્કો રુબિયોએ જણાવ્યું હતું કે પ્રદેશમાં ઉભી થયેલી કટોકટીને પહોંચી વળવા માટે આ શસ્ત્રોની તાત્કાલિક જરૂરિયાત છે, જેના કારણે સામાન્ય સંસદીય પ્રક્રિયાને બાયપાસ કરી આ વેચાણને વેગ આપવામાં આવ્યો છે.
આ સંરક્ષણ પેકેજ હેઠળ ઈઝરાયલ અને કતારને અંદાજે ૧ અબજ ડોલરના 'પ્રિસિઝન કિલ વેપન સિસ્ટમ્સ' (APKWS-II) પૂરા પાડવામાં આવશે. આ ઉપરાંત, કતારને ૪ અબજ ડોલરના પેટ્રિઓટ એડવાન્સ્ડ કેપેબિલિટી (PAC) મિસાઈલ ઈન્ટરસેપ્ટર્સ પણ મળશે, જે હવાઈ હુમલાઓ સામે રક્ષણ આપવા માટે સક્ષમ છે. આ સોદા માટે લોકહીડ માર્ટિન અને RTX કોર્પોરેશન જેવા સંરક્ષણ ક્ષેત્રના દિગ્ગજો મુખ્ય કોન્ટ્રાક્ટર તરીકે કામ કરશે, જે આગામી સમયમાં પ્રદેશની લશ્કરી ક્ષમતામાં અનેકગણો વધારો કરશે.
ઈરાન સાથેનો સંઘર્ષ નવમા અઠવાડિયામાં પ્રવેશી રહ્યો હોવાથી આ મંજૂરી અત્યંત સૂચક માનવામાં આવે છે. જોકે હાલમાં નાજુક યુદ્ધવિરામ અમલમાં છે, પરંતુ કોઈ ઔપચારિક શાંતિ કરાર થયો નથી, જેના પગલે સાથી દેશોને સુરક્ષા કવચ પૂરું પાડવું અમેરિકા માટે અનિવાર્ય બન્યું છે. અધિકારીઓના મતે, આ શસ્ત્ર વેચાણ પ્રદેશમાં સંતુલન જાળવી રાખવા અને દુશ્મન દેશોના સંભવિત હુમલાઓને ખાળવા માટે માસ્ટરસ્ટ્રોક સાબિત થઈ શકે છે.