​કોલકાતા : પશ્ચિમ બંગાળના રાજકારણમાં છેલ્લા કેટલાક દિવસોથી ચાલી રહેલી ભારે અફવાઓ અને રાજકીય પલટાની અટકળો વચ્ચે તૃણમૂલ કોંગ્રેસ (ટીએમસી)ના ફાયરબ્રાન્ડ સાંસદ મહુઆ મોઇત્રાએ ભારતીય જનતા પાર્ટી (ભાજપ)માં જોડાવાની ચર્ચાઓ પર આખરે પોતાનું મૌન તોડ્યું છે. સોશિયલ મીડિયા પર વાયરલ થયેલા એક ઇન્ટરવ્યુ અને ત્યારબાદ વહેતી થયેલી અફવાઓ અંગે સત્તાવાર સ્પષ્ટતા કરતા મહુઆ મોઇત્રાએ સ્પષ્ટ શબ્દોમાં જણાવ્યું છે કે તેઓ ક્યારેય પણ ગદ્દાર બ્રિગેડનો હિસ્સો બનવાના નથી અને તેમનો મકસદ હંમેશાં મજબૂતાઈથી લડવાનો રહ્યો છે.

​પશ્ચિમ બંગાળમાં સત્તાધારી પક્ષ તૃણમૂલ કોંગ્રેસના કેટલાક સાંસદો અને ધારાસભ્યોના બળવાખોર વલણ વચ્ચે મહુઆ મોઇત્રાના એક આંતરરાષ્ટ્રીય મીડિયા સંસ્થાનને આપેલા ઇન્ટરવ્યુનો હિસ્સો વાયરલ થયો હતો. આ વીડિયોમાં તેઓ ભાજપના વર્તમાન નેતા શુભેન્દુ અધિકારી જ્યારે ટીએમસીમાં હતા, તે સમયના જૂના સંદર્ભો અને તેમની સાથેના સારા રાજકીય સંબંધોની ચર્ચા કરતા જોવા મળ્યા હતા. ભૂતકાળમાં મુશ્કેલ સમય દરમિયાન શુભેન્દુ અધિકારી દ્વારા કરવામાં આવેલી મદદનો ઉલ્લેખ થતા જ રાજકીય ગલિયારાઓમાં એવી અટકળો તેજ થઈ ગઈ હતી કે મહુઆ મોઇત્રા પણ પોતાની વફાદારી બદલીને ભાજપનો ભગવો ધારણ કરી શકે છે.

​આ વિવાદ વધુ વકરતા ટીએમસી સાંસદે મોડી રાત્રે સોશિયલ મીડિયા પ્લેટફોર્મ 'X' પર એક સત્તાવાર પોસ્ટ શેર કરીને તમામ અફવાઓનું ખંડન કર્યું હતું. મનઘડત વાર્તાઓ બનાવનારાઓ પર આકરા પ્રહારો કરતા તેમણે લખ્યું કે, મનઘડત કથાઓ વણનારા લોકોએ પોતાની જિંદગી પર ધ્યાન આપવું જોઈએ. વાયરલ થઈ રહેલી ટિપ્પણી તદ્દન જૂના સંદર્ભમાં કરવામાં આવી હતી અને તેને વર્તમાન પરિસ્થિતિ સાથે કોઈ લેવાદેવા નથી. તેમણે ભારપૂર્વક જણાવ્યું કે તેઓ પક્ષ છોડીને ગયેલા બળવાખોરોની સાથે ક્યારેય જવાના નથી.

​આ પૂર્વે પક્ષના ૧૯ જેટલા બળવાખોર સાંસદો સામે પણ મહુઆ મોઇત્રાએ મોરચો ખોલ્યો હતો. બળવાખોરોને આડે હાથ લેતા તેમણે જણાવ્યું હતું કે, જે નેતાઓ માત્ર મમતા બેનર્જીના કરિશ્માના જોરે રાજકારણ ચમકાવી રહ્યા હતા, તેમનામાં હવે વિપક્ષમાં બેસીને ભાજપ સામે લડવાની હિંમત રહી નથી. કેન્દ્રીય તપાસ એજન્સીઓના ડરથી અને દબાણમાં આવીને જે લોકો પક્ષ છોડીને જવા માંગે છે તેઓ ભલે જાય, પરંતુ સંસદમાં અલગ જૂથ બનાવવાની વાતો કાયદાકીય રીતે ખોટી છે. જો તેમનામાં ખરેખર હિંમત હોય તો તેમણે પહેલા સાંસદ પદેથી રાજીનામું આપવું જોઈએ અને ત્યારબાદ ભાજપની ટિકિટ પર નવેસરથી ચૂંટણી લડીને બતાવવું જોઈએ.

​પશ્ચિમ બંગાળમાં ચાલી રહેલા આ રાજકીય ઘમસાણ વચ્ચે મહુઆ મોઇત્રાના આ ખુલાસાથી તૃણમૂલ કોંગ્રેસના છાવણીમાં ચાલી રહેલી ચિંતાઓ પર હાલ પૂરતો વિરામ મુકાયો છે, જ્યારે ભાજપ તરફથી પણ આ સમગ્ર ઘટનાક્રમ પર ઝીણવટભરી નજર રાખવામાં આવી રહી છે. પક્ષ પ્રત્યેની વફાદારી અકબંધ રાખવાના દાવા સાથે મહુઆએ સ્પષ્ટ કર્યું છે કે તેમની રાજકીય લડત ચોક્કસ વિચારધારા સામે ચાલુ જ રહેશે.