નવી દિલ્હી :વૈશ્વિક સ્તરે સર્જાયેલી રાજકીય અસ્થિરતાની સીધી અસર ભારતીય બજારમાં જોવા મળી રહી છે, જ્યાં જીવન જરૂરિયાતની વસ્તુઓથી લઈને મોંઘી ધાતુઓના ભાવમાં અનિશ્ચિતતાનો માહોલ છે. રાંધણ ગેસના પુરવઠાને લઈને સરકાર સતત ખાતરી આપી રહી છે કે દેશમાં પર્યાપ્ત જથ્થો ઉપલબ્ધ છે, તેમ છતાં પહાડી વિસ્તારો અને પૂર્વ ભારતના રાજ્યોમાં સિલિન્ડરના ભાવ ₹૧,૦૦૦ ને પાર કરી ગયા છે. સીએનજીના ભાવમાં પણ શહેર મુજબ મોટો તફાવત હોવાથી ટેક્સી અને ઓટો ચાલકોના દૈનિક આર્થિક ગણિત ખોરવાઈ રહ્યા છે.

ઝવેરી બજારમાં સોનાના ભાવ સ્થિર હોવા છતાં તે અત્યાર સુધીની સર્વોચ્ચ સપાટીની આસપાસ હોવાથી મધ્યમ વર્ગ માટે રોકાણ કરવું કે ઘરેણાં ખરીદવા મુશ્કેલ બન્યા છે. ૨૪ કેરેટ સોનાના ભાવ પ્રતિ ૧૦ ગ્રામ ₹૧.૫૪ લાખથી વધુ હોવા પાછળ આંતરરાષ્ટ્રીય ફુગાવો અને ડોલરની મજબૂતી જવાબદાર ગણવામાં આવે છે. બીજી તરફ, યુએસ ફેડરલ રિઝર્વ દ્વારા વ્યાજદરમાં ફેરફાર કરવાની અટકળોને કારણે આગામી સપ્તાહમાં સોના-ચાંદીના ભાવમાં હજુ પણ તેજી જોવા મળી શકે છે તેવી શક્યતા નિષ્ણાતો વ્યક્ત કરી રહ્યા છે.

ઈંધણના ક્ષેત્રમાં પણ સ્થાનિક ટેક્સ અને પરિવહન ખર્ચને લીધે વિવિધ રાજ્યોમાં ભાવના મોટા તફાવતે જનતાને મુંઝવણમાં મૂકી છે. જ્યાં પુડુચેરીમાં સીએનજી સૌથી સસ્તો મળી રહ્યો છે, ત્યાં હિમાચલ પ્રદેશમાં સામાન્ય કરતા દોઢા ભાવ વસૂલવામાં આવી રહ્યા છે. પેટ્રોલિયમ મંત્રાલયે નવા જોડાણો પર કામચલાઉ પ્રતિબંધ લગાવીને વર્તમાન ગ્રાહકોના હિત રક્ષવાની વાત કરી છે, પરંતુ વધતી જતી મોંઘવારી સામે ગ્રાહકોને ક્યારે કાયમી રાહત મળશે તે જોવું રહ્યું.