​મુંબઈ: બોલીવુડના મહાનાયક અમિતાભ બચ્ચનની કારકિર્દીમાં અનેક યાદગાર ફિલ્મો અને ગીતો નોંધાયેલા છે, પરંતુ કેટલાક ગીતો એવા હોય છે જે સમયની સાથે જૂના થવાને બદલે વધુ લોકપ્રિય બનતા જાય છે. આવું જ એક અમર ગીત એટલે ૧૯૮૧માં આવેલી ફિલ્મ 'યારાના'નું 'છૂકર મેરે મન કો કિયા તૂને ક્યા ઈશારા'. આ ગીત વિશે એક રસપ્રદ તથ્ય એ છે કે તે માત્ર એક ફિલ્મી ગીત નથી, પરંતુ તે ગુરુદેવ રવીન્દ્રનાથ ટાગોરની એક અમર રચનામાંથી પ્રેરણા લઈને તૈયાર કરવામાં આવ્યું હતું.

​રવીન્દ્ર સંગીતમાંથી લીધી પ્રેરણા

સંગીતપ્રેમીઓમાં આજે પણ ગુંજતું આ ગીત વાસ્તવમાં રવીન્દ્રનાથ ટાગોરના પ્રસિદ્ધ 'રવીન્દ્ર સંગીત' – 'તુમાર હોલો શુરુ, આમાર હોલો સારા' (Tomaar Holo Shuru Aamar Holo Shaaraa) થી પ્રભાવિત છે. સંગીતકાર રાજેશ રોશને ગુરુદેવની આ અદ્ભુત બંગાળી રચનાને હિન્દી સિનેમાના માહોલમાં ખૂબ જ કુશળતાપૂર્વક ઢાળી હતી. ગીતની શરૂઆતની પંક્તિઓ સીધી રીતે આ રવીન્દ્ર સંગીતમાંથી લેવામાં આવી છે, જે તેને એક અલગ જ ગહનતા અને શાંતિ આપે છે.

​કિશોર કુમારના અવાજનો જાદુ

આ ગીતને પોતાની મखमલી અને રુંવાડા ઉભા કરી દે તેવી અવાજમાં કિશોર કુમારે ગાયું હતું. ગીતકાર અંજાન દ્વારા લખાયેલા આ ગીતના શબ્દો અને કિશોર કુમારના ગાયકીના અંદાજે તેને એક 'કલ્ટ ક્લાસિક' બનાવી દીધું. ફિલ્મ 'યારાના'માં અમિતાભ બચ્ચન અને અમજદ ખાનની દોસ્તી મુખ્ય વિષય હતો, પરંતુ આ રોમેન્ટિક ગીતે દર્શકોના હૃદયમાં એક અલગ સ્થાન બનાવ્યું હતું.

​આજે ૪૫ વર્ષ પછી પણ જ્યારે આ ગીત સાંભળવા મળે છે, ત્યારે તે એટલું જ તાજગીભર્યું લાગે છે. અમિતાભ બચ્ચન પર ફિલ્માવવામાં આવેલા આ ગીતે સાબિત કર્યું છે કે ઉત્તમ સંગીત ક્યારેય સીમાઓ કે સમયના બંધનમાં બંધાતું નથી. ગુરુદેવની કલા અને બોલીવુડના સૂરનો આ સુમેળ આજે પણ સંગીત રસિકો માટે એક અમૂલ્ય વિરાસત સમાન છે.