મુંબઈ : નેશનલ સ્ટોક એક્સચેન્જ (NSE) ના તાજેતરના રિપોર્ટ અનુસાર, સક્રિય ગ્રાહકોની સંખ્યાની દૃષ્ટિએ એન્જલ વન લિમિટેડ દેશની બીજા ક્રમની સૌથી મોટી સ્ટોક બ્રોકિંગ કંપની તરીકે ઉભરી આવી છે, જેના સક્રિય ગ્રાહકો વધીને ૬૯.૯૮ લાખ પર પહોંચી ગયા છે.

પ્રાપ્ત વિગતો અનુસાર, ભારતીય રિટેલ રોકાણકારોમાં ડિજિટલ ટ્રેડિંગ પ્લેટફોર્મની વધતી સ્વીકૃતિ અને ટેક્નોલોજી આધારિત સુવિધાઓના કારણે કંપનીએ માત્ર ઓક્ટોબર મહિનામાં જ ચોખ્ખા ધોરણે ૨.૪૩ લાખ નવા સક્રિય ગ્રાહકો ઉમેર્યા છે.

આ સિદ્ધિ સાથે કંપનીનો કુલ ગ્રાહકવર્ગ વધીને ૪.૦૬ કરોડ થયો છે, અને નાણાકીય વર્ષ ૨૦૨૬-૨૭ના બીજા ત્રિમાસિક ગાળામાં કંપનીની ઓપરેશનલ આવક વાર્ષિક ૧૮.૭ ટકા વધીને રૂપિયા ૧,૪૨૭ કરોડ તથા ચોખ્ખો નફો ૫૮.૨ ટકા વધીને રૂપિયા ૩૩૫ કરોડ નોંધાયો છે.

બજારના અહેવાલો મુજબ, ગ્રાહકોને અપાતી ફંડિંગ સુવિધાથી મળતી વ્યાજની આવક અને વેલ્થ મેનેજમેન્ટ ક્ષેત્રે એસેટ્સ અંડર મેનેજમેન્ટ (AUM) ૧૬૦.૫ ટકા વધીને રૂપિયા ૧૬,000 કરોડ પર પહોંચતા બિઝનેસ મોડલ વધુ મજબૂત બન્યું છે.

રોકાણકારો અને નાણાકીય નિષ્ણાતોના મતે, આ વૃદ્ધિ દેશમાં વધતા નાણાકીય સાક્ષરતા પ્રમાણ અને ઓનલાઈન ટ્રેડિંગ તરફ યુવા વર્ગના વધતા આકર્ષણનું સ્પષ્ટ પરિણામ દર્શાવે છે.

આગામી સમયમાં કંપની દ્વારા ટેક્નોલોજી પ્લેટફોર્મને વધુ અદ્યતન બનાવીને ગ્રાહકોને વધુ સારી સેવાઓ પૂરી પાડવા માટેના નવા આયોજનો હાથ ધરવામાં આવશે તેવી અપેક્ષા રાખવામાં આવી છે.