કાનપુર:  સોશિયલ મીડિયા ઇન્ફ્લુએન્સર અને એક્ટ્રેસ અંજલિ અરોરા ફરી એકવાર ગંભીર વિવાદના વંટોળમાં ફસાઈ છે. જે "કચ્ચા બદામ" ગીત પર ડાન્સ કરીને અંજલિ રાતોરાત દેશભરમાં ફેમસ થઈ હતી, તે જ ગીત સાંભળીને તે કાનપુરમાં યોજાયેલા એક લાઈવ ઈવેન્ટ દરમિયાન ભડકી ગઈ હતી. કાનપુરમાં આયોજિત એક ભવ્ય કાર્યક્રમમાં અંજલિને લાખો રૂપિયાની ફી આપીને ખાસ આમંત્રિત કરવામાં આવી હતી. જોકે, સ્ટેજ પર પર્ફોર્મન્સ દરમિયાન ડીજે દ્વારા 'કચ્ચા બદામ' ગીત વગાડવામાં આવતાં જ અંજલિ ગુસ્સે થઈ ગઈ હતી અને મેનેજમેન્ટ પર સવાલો ઉઠાવી માત્ર ૧૫ જ મિનિટમાં હંગામો મચાવીને સ્ટેજ છોડીને જતી રહી હતી.

આ ઘટના બાદ ઈવેન્ટ આયોજકે અંજલિ અરોરા સામે ભારે રોષ વ્યક્ત કર્યો છે અને તેની સામે કાનૂની કાર્યવાહી કરવાની ખુલ્લી ધમકી આપી છે. 'સ્ટેટ મીડિયા 24' સાથેની ખાસ વાતચીતમાં આયોજકે આરોપ લગાવ્યો હતો કે અંજલિએ આ બધું માત્ર પબ્લિસિટી મેળવવા માટે કર્યું હતું. તેમણે કહ્યું, "દરેક કલાકાર જાણે છે કે સ્ટેજનું એક ગૌરવ હોય છે. જો તેને ગીત સામે કોઈ વાંધો હતો, તો તે કાર્યક્રમ પૂરો થયા પછી મેનેજમેન્ટ સાથે વાત કરી શકતી હતી. પરંતુ તે કોઈ પણ સ્પષ્ટતા આપ્યા વગર શો અધૂરો મૂકીને ચાલી ગઈ, જેનાથી અમને લાખો રૂપિયાનું ભારે નાણાકીય અને પ્રતિષ્ઠાનું નુકસાન થયું છે."

બીજી તરફ, આ ઘટનાનો વીડિયો સોશિયલ મીડિયા પર વાયરલ થતાં યુઝર્સ પણ અંજલિના આ વર્તન પર વિવિધ પ્રતિક્રિયાઓ આપી રહ્યા છે. વર્કફ્રન્ટની વાત કરીએ તો, અંજલિ અરોરા તાજેતરમાં રિલીઝ થયેલી મહાકાવ્ય ફિલ્મ 'શ્રી રામાયણ કથા'માં માતા સીતાની ભૂમિકામાં જોવા મળી હતી, જોકે આ ફિલ્મને થિયેટરોમાં ખાસ પ્રતિસાદ મળ્યો ન હતો. કાનપુરની ઈવેન્ટમાં પર્ફોર્મ કર્યા વગર જતી રહેવા અને આયોજકોના આક્ષેપો અંગે અંજલિ અરોરા તરફથી હજુ સુધી કોઈ સત્તાવાર સ્પષ્ટતા કે નિવેદન સામે આવ્યું નથી.