રાળગણ સિદ્ધિ : દેશમાં ભ્રષ્ટાચાર વિરોધી આંદોલનના જનક અને પીઢ સામાજિક કાર્યકર અન્ના હજારેએ ફરી એકવાર સરકાર સામે મોરચો માંડ્યો છે. મહારાષ્ટ્ર સરકાર દ્વારા માહિતી અધિકાર (RTI) કાયદામાં કરવામાં આવેલા નવા ફેરફારો સામે સખત વાંધો ઉઠાવતા, અન્ના હજારેએ મહારાષ્ટ્ર માહિતી અધિકાર નિયમો-૨૦૨૬ નો ઉગ્ર વિરોધ કર્યો છે. તેમણે રાજ્ય સરકારને આખરી ચેતવણી આપી છે કે જો પારદર્શિતા લાવતા આ કાયદાને નબળો પાડતા સુધારા તાત્કાલિક અસરથી પાછા ખેંચવામાં નહીં આવે, તો તેઓ આગામી ૫ જુલાઈથી અનિશ્ચિત સમય માટે (આજીવન) ભૂખ હડતાળ પર ઉતરી જશે.

અન્ના હજારેએ સરકારના આ આદેશ સામે આકરા પ્રહારો કરતા આક્ષેપ કર્યો છે કે, નવા નિયમો હેઠળ દાખલ કરવામાં આવેલી મનસ્વી જોગવાઈઓ મૂળ માહિતી અધિકાર કાયદાની મુખ્ય ભાવનાને જ ખતમ કરી નાખે છે. આ સુધારાઓને કારણે સામાન્ય નાગરિકો માટે સરકારી કચેરીઓ કે જાહેર સત્તાવાળાઓ પાસેથી કોઈ પણ પ્રકારની ગુપ્ત કે પારદર્શક માહિતી મેળવવી અત્યંત જટિલ અને મુશ્કેલ બની જશે. અન્નાજીના મતે, આ કાયદો સામાન્ય જનતાને સત્તાધીશો સામે સવાલ પૂછવાની તાકાત આપે છે અને તેમાં કોઈ પણ પ્રકારની છેડછાડ સાંખી લેવામાં નહીં આવે.

લોકશાહીના આ મહત્વપૂર્ણ હથિયારને બચાવવા માટે અન્ના હજારે અગાઉ પણ અનેક ઐતિહાસિક આંદોલનો કરી ચૂક્યા છે. હવે જ્યારે મહારાષ્ટ્ર સરકાર આ નિયમોને કડક બનાવીને નાગરિકોના હક સીમિત કરવા જઈ રહી છે, ત્યારે ૮૦ થી વધુની વય વટાવી ચૂકેલા આ વરિષ્ઠ આંદોલનકારીના ઉપવાસની જાહેરાતથી મહારાષ્ટ્રના રાજકીય વર્તુળો અને સચિવાલયમાં ભારે ફફડાટ વ્યાપી ગયો છે. જો આગામી દિવસોમાં સરકાર આ નિયમો પર પુનઃવિચાર નહીં કરે, તો મહારાષ્ટ્રમાં ફરી એકવાર મોટું લોકઆંદોલન ફાટી નીકળવાના એંધાણ દેખાઈ રહ્યા છે.