મુંબઈ, તા.૨૧: મહારાષ્ટ્રના રાજકારણમાં ગરમાવો ફરી એકવાર ચરમસીમાએ પહોંચ્યો છે. શિવસેના (ઉદ્ધવ બાલાસાહેબ ઠાકરે) જૂથે એકનાથ શિંદેની આગેવાની હેઠળની શિવસેના સાથે પોતાના ૬ સાંસદોના વિલીનીકરણ (Merger) ના નિર્ણયને પડકારતા દેશની સર્વોચ્ચ અદાલત એટલે કે સુપ્રિમ કોર્ટના દરવાજા ખટખટાવ્યા છે. આ કાનૂની પગલા બાદ મહારાષ્ટ્રના રાજકીય વર્તુળોમાં ભારે ખળભળાટ મચી ગયો છે.

ઉદ્ધવ ઠાકરે જૂથનો દાવો છે કે ૬ સાંસદોનું શિંદે જૂથમાં વિલીનીકરણ કાનૂની અને બંધારણીય જોગવાઈઓનું ઉલ્લંઘન છે. આ મામલે દાખલ કરવામાં આવેલી અરજીમાં સંસદીય નિયમો અને પક્ષપલટા વિરોધી કાયદા હેઠળ યોગ્ય કાર્યવાહી કરવાની માંગ કરવામાં આવી છે.

શું છે સમગ્ર વિવાદ?

મહારાષ્ટ્રમાં શિવસેનામાં પડેલા બે ફાંટા બાદથી જ બંને જૂથો વચ્ચે ખરી શિવસેના અને તેના પક્ષીય પદચિહ્નો પર વર્ચસ્વ જમાવવાની કાનૂની લડાઈ ચાલી રહી છે. અગાઉ સંસદમાં ૬ સાંસદોએ એકનાથ શિંદે જૂથ સાથે જોડાણ કર્યું હતું, જેને સ્પિકર અને સંસદીય માન્યતા મળી હતી. જોકે, UBT જૂથ આ નિર્ણયને અસંવિધાનિક ગણાવી રહ્યું છે.

જો સુપ્રિમ કોર્ટ આ અરજી પર વિચારણા કરીને કોઈ કડક આદેશ આપે છે, તો શિંદે જૂથ માટે આ મોટો આંચકો સાબિત થઈ શકે છે. હવે સૌની નજર સુપ્રિમ કોર્ટ આ સંવેદનશીલ રાજકીય મુદ્દા પર ક્યારે સુનાવણી હાથ ધરે છે તેના પર ટકેલી છે.