શિમલા : હિમાચલ પ્રદેશમાં વરસાદી આફત પૂર્ણ થયા બાદ હવામાન ખુલ્લું અને સ્વચ્છ થતાં જ પર્વતો પોતાની નયનરમ્ય ભવ્યતામાં પાછા ફર્યા છે, જેને પગલે રાજ્યના પર્યટન ઉદ્યોગે અચાનક મોટી ગતિ પકડી છે. સપ્તાહના અંતે શિમલા, કસૌલી, મનાલી અને ધર્મશાલા જેવા મુખ્ય પર્યટન સ્થળોએ હોટેલ ઓક્યુપન્સી ૬૦ થી ૮૦ ટકા સુધી પહોંચી ગઈ છે. દિવસ દરમિયાન મનાલીમાં હોટેલ ઓક્યુપન્સી પ૫ થી ૬૦ ટકા હતી, જે મોડી સાંજ સુધીમાં વધુ વધી હતી. શારદીય નવરાત્રિના પાવન પર્વ નિમિત્તે ખાસ કરીને પશ્ચિમ બંગાળ ઉપરાંત પંજાબ, હરિયાણા, મુંબઈ અને અન્ય રાજ્યોમાંથી પ્રવાસીઓ મોટી સંખ્યામાં પર્વતો તરફ ઉમટી રહ્યા છે.

આ સાથે જ વિદેશી પ્રવાસીઓની પણ નોંધપાત્ર હાજરી જોવા મળી રહી છે. પ્રવાસીઓની સતત વધતી સંખ્યાના કારણે ખાનગી વાહનોનું દબાણ વધતાં મુખ્ય માર્ગો અને જોવાલાયક સ્થળોની આસપાસ ટ્રાફિક જામની સમસ્યા સર્જાઈ રહી છે, જે ટૂરિસ્ટ ઉત્સાહ પર થોડી અસર કરી રહી છે. બીજી તરફ, શારદીય નવરાત્રિના પાવન પ્રસંગે કાંગડા, બિલાસપુર, ઉના, શિમલા અને સિરમૌરમાં આવેલી પ્રસિદ્ધ શક્તિપીઠો પર ભક્તોની વિશાળ ભીડ દર્શનાર્થે ઉમટી પડી છે. હોટલ માલિકો હાલમાં કોઈ ખાસ ડિસ્કાઉન્ટ આપી રહ્યા નથી, છતાં પ્રવાસીઓની આવક સતત ચાલુ રહી છે.

ટૂરિઝમ ડેવલપમેન્ટ કોર્પોરેશન દ્વારા સંચાલિત હોટલો અને ફાઇવ સ્ટાર હોટલોમાં રૂમ ૪૦ થી ૬૦ ટકા સુધી એડવાન્સ બુકિંગ સાથે ઉપલબ્ધ થઈ રહ્યા છે, જ્યારે હોમસ્ટે અને ગ્રામીણ વિસ્તારો તરફ પણ પ્રવાસીઓ વધુ આકર્ષાઈ રહ્યા છે. આ મોસમમાં આવતા ટૂરિસ્ટ્સના કારણે સ્થાનિક હસ્તકળા અને વેપારને ખૂબ જ મોટો ફાયદો મળી રહ્યો છે, જેમાં હિમાચલી ટોપીઓ, શાલ, ઊની વસ્ત્રો, સ્થાનિક હસ્તકલા, મધ, પરંપરાગત અથાણાં અને સફરજનમાંથી બનતી બનાવટોની ખરીદીમાં જબરદસ્ત વધારો નોંધાયો છે.

લાંબા સમય સુધી ચાલેલા ભારે વરસાદથી પ્રભાવિત થયેલા હિમાચલના પ્રવાસન ઉદ્યોગ માટે આ રોનક મોટા રાહતના સમાચાર લઈને આવી છે. આગામી તહેવારો અને શિયાળાની ટૂરિસ્ટ સીઝન માટે વેપારીઓની આશાઓ ખૂબ વધી ગઈ છે. તંત્ર દ્વારા માર્ગો પરથી ટ્રાફિક હળવો કરવા અને શક્તિપીઠો પર ભીડ નિયંત્રણ માટે વધારાનો પોલીસ બંદોબસ્ત ગોઠવવામાં આવ્યો છે, જ્યારે આવનારા દિવસોમાં પ્રવાસીઓની સંખ્યામાં હજુ પણ મોટો વધારો થવાની ધારણા સેવાઈ રહી છે.