​ગુવાહાટી: અસમના ગુવાહાટી શહેરમાં સોમવારે મોડી સાંજે એક અત્યંત સનસનાટીભર્યા ગોળીબારની ઘટના સામે આવી છે. ગુવાહાટીના ઉલૂબારી સ્થિત બોરા સર્વિસ વિસ્તારમાં જી.એસ. રોડ પર આવેલી 'હોટેલ બિલાસ ઇન' (Hotel Bilas Inn) નજીક અજાણ્યા હુમલાખોરોએ અંધાધૂંધ ગોળીબાર કરતા ઓછામાં ઓછા ૪ લોકોના ઘટનાસ્થળે જ મોત નીપજ્યા છે. આ હુમલામાં મહિલાઓ સહિત અનેક લોકો ગંભીર રીતે ઇજાગ્રસ્ત થયા છે, જેના કારણે મૃત્યુઆંક હજુ વધે તેવી ભીતિ સેવવામાં આવી રહી છે.

​રિસેપ્શન કાઉન્ટર પાસે લોહીના ખાબોચિયાં, ભયનો માહોલ
​પ્રાથમિક માહિતી અનુસાર, આ ઘટના સોમવારે સાંજે આશરે ૯:૩૦ થી ૧૦ વાગ્યાના ગાળામાં બની હતી. હોટેલ અને તેની નજીક આવેલા કલ્યાણ જ્વેલર્સ પાસેની ગલીમાં અચાનક હુમલાખોરોએ અંધાધૂંધ ધાણીપાસીની જેમ ગોળીઓ વરસાવવાનું શરૂ કર્યું હતું.

​સોશિયલ મીડિયા પર વાયરલ થયેલા કેટલાક વિડીયોમાં હોટેલના રિસેપ્શન કાઉન્ટર પાસે મહિલા અને પુરુષ લોહીલુહાણ હાલતમાં પડેલા જોવા મળ્યા હતા. ફાયરિંગના આ બનાવ બાદ સમગ્ર વિસ્તારમાં ભારે ભય અને અફરાતફરીનો માહોલ સર્જાઈ ગયો હતો.

​ઇજાગ્રસ્તોની હોસ્પિટલમાં સારવાર, મૃતકોની ઓળખ ચાલુ
​ગોળીબારની જાણ થતાં જ ગુવાહાટી પોલીસનો ઉચ્ચ કક્ષાનો કાફલો અને ફોરેન્સિક ટીમ ઘટનાસ્થળે દોડી ગઈ હતી. ઇજાગ્રસ્ત થયેલા હોટેલ સ્ટાફ અને અન્ય લોકોને તાત્કાલિક ધોરણે ગુવાહાટી મેડિકલ કોલેજ એન્ડ હોસ્પિટલ (GMCH) ખાતે ખસેડવામાં આવ્યા છે, જ્યાં બે લોકોની હાલત અત્યંત નાજુક હોવાનું કહેવાય છે.

​મૃત્યુ પામેલા લોકોમાં ૩ પુરુષ અને ૧ મહિલાનો સમાવેશ થાય છે. તમામ મૃતદેહોને પોસ્ટમોર્ટમ માટે ખસેડીને તેમની ઓળખ છતી કરવાના પ્રયાસો હાથ ધરવામાં આવ્યા છે.

​“ગુનેગારોને ટૂંક સમયમાં ઝડપી પાડવામાં આવશે” – ગુવાહાટી પોલીસ કમિશનર

ગુવાહાટીના પોલીસ કમિશનર પાર્થ સારથિ મહંતે બનાવ અંગે માહિતી આપતા જણાવ્યું હતું કે, “આ એક ખૂબ જ કમનસીબ ઘટના છે. અત્યાર સુધીમાં ૪ મૃતદેહ કબજે કરવામાં આવ્યા છે. સમગ્ર વિસ્તારમાં ઘેરાબંધી કરીને તપાસ શરૂ કરી દેવાઈ છે. હુમલા પાછળનો હેતુ હજુ સ્પષ્ટ થયો નથી. પરંતુ અમે આશ્વાસન આપીએ છીએ કે આ જઘન્ય ગુનો આચરનારા ગુનેગારોને વહેલી તકે દબોચી લેવામાં આવશે.”

​હુમલાનું કારણ અસ્પષ્ટ: ગેંગવોર કે અંગત અદાવત?
​આટલા ભીડભાડવાળા વિસ્તારમાં ઘટેલી લોહિયાળ ઘટના પાછળ અંગત અદાવત છે, કોઈ વ્યાપારી વિવાદ કે પછી ગેંગવોરનો મામલો છે તે અંગે પોલીસે ગુપ્ત તપાસ હાથ ધરી છે. હોટેલ અને આસપાસના સીસીટીવી (CCTV) કેમેરાના ફૂટેજ ચકાસવાની કામગીરી ચાલુ છે અને ટૂંક સમયમાં જ મુખ્ય આરોપીઓની ધરપકડ કરવામાં આવશે તેમ પોલીસે ઉમેર્યું હતું.