ગુવાહાટી, તા.૨૭: આસામના નાના એવા ગામમાંથી નીકળીને વિશ્વના સૌથી ઊંચા શિખર માઉન્ટ એવરેસ્ટની ટોચ પર પહોંચીને ઇતિહાસ રચનાર રૂપામણી ગોરે સમગ્ર દેશનું નામ રોશન કર્યું છે. માઉન્ટ એવરેસ્ટ સર કરનાર આસામની પ્રથમ મહિલા બનવાનું ગૌરવ હાંસલ કરનાર રૂપામણીનું આસામના મુખ્યમંત્રી હિમંતા બિસ્વા શર્મા દ્વારા લોક સેવા ભવન, ગુવાહાટી ખાતે આયોજિત એક વિશેષ સમારોહમાં ભવ્ય સન્માન કરવામાં આવ્યું હતું. મુખ્યમંત્રીએ તેમની અદમ્ય સાહસવૃત્તિ અને દૃઢ નિશ્ચયની પ્રશંસા કરતા રૂ. ૧૦ લાખની આર્થિક સહાય અર્પણ કરી હતી.
આર્થિક સંકટો વચ્ચે સપનાઓને આપી ઉડાન
આસામના લખીમપુર જિલ્લાના લીલાબારી ગામની રહેવાસી રૂપામણી ગોરની એવરેસ્ટ સુધીની સફર અત્યંત સંઘર્ષપૂર્ણ રહી છે. સામાજિક અને આર્થિક પડકારો હોવા છતાં, તેણે પર્વતારોહણ પ્રત્યેનો પોતાનો જુસ્સો ક્યારેય ઘટવા દીધો નહોતો. ૨૧ મે, ૨૦૨૬ ના રોજ તેણે માઉન્ટ એવરેસ્ટના ૮,૮૪૯ મીટર ઊંચા શિખર પર સફળતાપૂર્વક પગ મૂક્યો હતો.
અતિશય વિષમ હવામાન, માઈનસ તાપમાન, ઓક્સિજનની ઉણપ અને સતત થતા અસહ્ય માથાના દુખાવા વચ્ચે પણ તેણે હિંમત હારી નહોતી અને મહિનાઓની કઠોર શારીરિક તાલીમના બળે સફળતા મેળવી હતી.
"શરૂઆતમાં જ્યારે મેં પ્રથમ ચઢાણ કર્યું ત્યારે મને લાગ્યું હતું કે હું આ ક્ષેત્રમાં આગળ વધી શકીશ નહીં. અતિશય વજનદાર સાધનો ઊંચકીને ચઢવું, પૂરતું ખાવા કે ઊંઘવા ન મળવું ખૂબ મુશ્કેલ હતું. પરંતુ ૨૧ મેના રોજ જ્યારે શિખર સર કર્યું ત્યારે બધી પીડા ગાયબ થઈ ગઈ. બેઝ કેમ્પથી ટોચ સુધી પહોંચવામાં અમને ૪ દિવસ લાગ્યા હતા."
— રૂપામણી ગોર, એવરેસ્ટ વિજેતા
૧૪ માંથી ૧૧ ગર્લ્સ સિલેક્ટ થઈ અને રચ્યો ઇતિહાસ
પોતાની તાલીમ અંગે વિગતો આપતાં રૂપામણીએ જણાવ્યું કે, ૨૦૨૪ માં બેઝિક કોર્સ અને ૨૦૨૫ માં એડવાન્સ તાલીમ પૂરી કર્યા બાદ ૨૦૨૬ ના પ્રારંભે એવરેસ્ટ અભિયાન માટે ૨ મહિનાની કઠોર પ્રી-ટ્રેનિંગ આપવામાં આવી હતી. ૧૪ માંથી ૧૧ યુવતીઓની આ આખરી સફર માટે પસંદગી થઈ હતી, જેમાં રૂપામણીએ આસામનું પ્રતિનિધિત્વ કરીને સફળતાનો ઝંડો લહેરાવ્યો હતો.
મુખ્યમંત્રી હિમંતા બિસ્વા શર્માએ આ ક્ષણને આસામ માટે ઐતિહાસિક સીમાચિહ્નરૂપ ગણાવી હતી અને કહ્યું કે રૂપામણીની આ સિદ્ધિ રાજ્યની લાખો યુવતીઓ અને રમતવીરો માટે પ્રેરણાનો સ્ત્રોત બનશે.