ચેન્નાઈ, તા.૧૯: આઈપીએલ ૨૦૨૬ (IPL 2026) માં સનરાઈઝર્સ હૈદરાબાદ (SRH) એ સોમવારે રમાયેલી હાઈ-વોલ્ટેજ મેચમાં ચેન્નાઈ સુપર કિંગ્સ (CSK) ને તેમના જ હોમ ગ્રાઉન્ડ પર ધૂળ ચટાડીને પ્લેઓફમાં પોતાનું સ્થાન પાકું કરી લીધું છે. આ શાનદાર જીત બાદ હૈદરાબાદના કેમ્પમાં ભારે ઉત્સાહનો માહોલ છે, પરંતુ મેદાનની બહાર સ્ટેડિયમમાં બનેલી એક ઘટના અત્યારે ઇન્ટરનેટ પર ભારે ચર્ચા જગાવી રહી છે. હૈદરાબાદના વિસ્ફોટક ઓપનર અભિષેક શર્માની માતાએ મેચ પૂરી થયા બાદ ચેન્નાઈના ચાહકોની એવી મજાક ઉડાવી કે સોશિયલ મીડિયા યુઝર્સ કહી રહ્યા છે— 'આન્ટી પાસે ખરેખર કોઈ ચિલ નથી!'

વાત જાણે એમ છે કે, ચેન્નાઈના એમ.એ. ચિદમ્બરમ સ્ટેડિયમમાં અભિષેક શર્માનો પરિવાર પણ ટીમનો ઉત્સાહ વધારવા હાજર હતો. હૈદરાબાદની જીત થતાં જ અભિષેકની બહેને ઇન્સ્ટાગ્રામ પર એક વીડિયો શેર કર્યો, જેમાં તેની માતા જીતની ભારે ખુશી મનાવતા હાથમાં 'પીળી સીટી' વગાડતી જોવા મળી રહી છે. આ વીડિયો વાયરલ થતાં જ ક્રિકેટપ્રેમીઓ તેને ચેન્નાઈ સુપર કિંગ્સના પ્રખ્યાત સ્લોગન "વ્હિસલ પોડુ" (સીટી વગાડો) અને તેમના પીળા રંગના પ્રતીક પર એક રમતિયાળ કટાક્ષ તરીકે જોઈ રહ્યા છે, કારણ કે આ હાર સાથે જ ચેન્નાઈની ટીમ ટૂર્નામેન્ટમાંથી બહાર થવાની અણી પર આવી ગઈ છે.

ઇશાન કિશને પણ જગાડ્યો હતો 'વ્હિસલ પોડુ' વિવાદ

આઈપીએલની ચાલુ સીઝનમાં ચેન્નાઈના ફેન્સ ટાર્ગેટ બન્યા હોય તેવી આ પહેલી ઘટના નથી. આ અગાઉ સ્ટાર વિકેટકીપર બેટ્સમેન ઇશાન કિશને પણ એક મેચ બાદ ચેન્નાઈના સ્ટેડિયમમાં દર્શકો તરફ ઈશારો કરીને એનિમેટેડ સ્ટાઈલમાં "વ્હિસલ પોડુ" ની એક્શન કરીને કટાક્ષ કર્યો હતો, જેણે સોશિયલ મીડિયા પર ભારે લાઈમલાઈટ મેળવી હતી.

પેટ કમિન્સની કપ્તાની હેઠળ હૈદરાબાદનો વિજયી રથ પ્લેઓફમાં

આ રોમાંચક મેચની વાત કરીએ તો, સનરાઈઝર્સ હૈદરાબાદના કેપ્ટન પેટ કમિન્સે બોલિંગમાં અદ્ભુત નેતૃત્વ પૂરું પાડ્યું હતું. કમિન્સે ઘાતક બોલિંગ કરતા ૩ મહત્વની વિકેટો ઝડપીને મજબૂત ગણાતી ચેન્નાઈની ટીમને માત્ર ૧૮૦/૭ ના સ્કોર પર રોકી દીધી હતી. ચેન્નાઈ તરફથી ડેવાલ્ડ બ્રેવિસે સૌથી વધુ ૪૪ રન બનાવ્યા હતા. ૧૮૧ રનના લક્ષ્યનો પીછો કરવા ઉતરેલી હૈદરાબાદની ટીમ વતી હેનરિક ક્લાસેને ૪૭ રનની ધમાકેદાર ઇનિંગ રમી હતી અને તેને ઇશાન કિશનનો મજબૂત સાથ મળ્યો હતો, જેના કારણે હૈદરાબાદે આસાનીથી મેચ જીતી પ્લેઓફની ટિકિટ મેળવી લીધી છે. ડિફેન્ડિંગ ચેમ્પિયન ચેન્નાઈની ક્વોલિફિકેશનની આશાઓને આ હારથી બહુ મોટો ઝટકો લાગ્યો છે.