નવી દિલ્હી, તા.29: અમેરિકા જવાનું સ્વપ્ન સેવતા લાખો ભારતીયો માટે ચોંકાવનારા સમાચાર સામે આવ્યા છે. યુએસ ગવર્નમેન્ટ એકાઉન્ટેબિલિટી ઓફિસ (GAO) ના તાજેતરના વૈશ્વિક અહેવાલમાં ખુલાસો થયો છે કે, નાણાકીય વર્ષ ૨૦૨૫ દરમિયાન સમગ્ર વિશ્વમાં મુખ્ય વિઝા પ્રોસેસિંગ દેશોમાંથી ભારતમાં યુએસ કોન્સ્યુલર અધિકારીઓ પર કામનું સૌથી વધુ અને અસહ્ય ભારણ નોંધાયું છે. ભારતમાં તહેનાત દરેક અમેરિકન વિઝા અધિકારીએ સરેરાશ ૨૧,૪૦૧ નોન-ઇમિગ્રન્ટ (બિન-સ્થળાંતરિત) વિઝા અરજીઓ સંભાળી હતી, જેના કારણે વિઝા ઇન્ટરવ્યૂ મેળવવા માટેનો સરેરાશ રાહ જોવાનો સમય (વેટિંગ પિરિયડ) વધીને ૩૪૬ દિવસ એટલે કે લગભગ એક આખા વર્ષ સુધી લંબાઈ ગયો છે.

ચીન અને બ્રાઝિલ કરતાં ભારતની સ્થિતિ અત્યંત ગંભીર

અહેવાલ મુજબ, નાણાકીય વર્ષ ૨૦૨૫માં યુએસ સ્ટેટ ડિપાર્ટમેન્ટને ભારતમાંથી કુલ ૧૪,૫૫,૨૫૫ (૧૪.૫૫ લાખથી વધુ) નોન-ઇમિગ્રન્ટ વિઝા અરજીઓ મળી હતી. જોકે, આટલા મસમોટા પહાડ જેવા કામ માટે ભારતમાં માત્ર ૬૮ કોન્સ્યુલર અધિકારીઓ જ કાર્યરત હતા. તુલનાત્મક રીતે જોઈએ તો, ચીનમાં ૧૧૯ અધિકારીઓએ ૧૨ લાખ અરજીઓ સંભાળી હતી (પ્રતિ અધિકારી ૧૦,૧૩૫ અરજી), જ્યાં ઇન્ટરવ્યૂ માટેનો વેટિંગ પિરિયડ માત્ર ૩૪ દિવસ છે. બ્રાઝિલમાં વેટિંગ સમય ૩૨ દિવસ અને મેક્સિકોમાં ૨૮૩ દિવસ નોંધાયો હતો, જે દર્શાવે છે કે તપાસવામાં આવેલા તમામ દેશોમાં ભારતની સ્થિતિ સૌથી વધુ કફોડી છે.

કોરોના અગાઉ માત્ર ૪૨ દિવસનો સમય લાગતો હતો

ભારતમાં વિઝિટર વિઝા માટેનો વેટિંગ ટાઈમ વર્ષ ૨૦૧૯માં માત્ર ૪૨ દિવસ હતો, જે વધીને આ વર્ષે ૩૪૬ દિવસની રેકોર્ડ સપાટીએ પહોંચી ગયો છે. વૈશ્વિક સ્તરે યુએસ નોન-ઇમિગ્રન્ટ વિઝા વિભાગમાં કામ કરતા અધિકારીઓની સંખ્યામાં પણ મોટો ઘટાડો થયો છે. ભરતી પરનો સ્ટે, રાજનાયિક ફેરફારો અને રાજીનામાને કારણે આ સંખ્યા ૧,૩૪૨ થી ઘટીને ૯૦૪ થઈ ગઈ છે. જોકે, અમેરિકાએ ભારતમાં કામચલાઉ ધોરણે વધારાનો સ્ટાફ મોકલ્યો હતો, પરંતુ માંગ એટલી પ્રચંડ છે કે બેકલોગ ઓછો થવાનું નામ નથી લઈ રહ્યો.

ઇન્ટરવ્યૂ ડેટ અને વિઝા નિર્ણય વચ્ચે તફાવત

ગ્રાઉન્ડ રિપોર્ટ અનુસાર, આ ૩૪૬ દિવસનો સમયગાળો માત્ર ઇન્ટરવ્યૂની સ્લોટ તારીખ મેળવવા માટેનો વેટિંગ સમય દર્શાવે છે, અને તેનો અર્થ એ નથી કે અંતિમ વિઝા નિર્ણય મેળવવામાં આટલો સમય લાગે છે. GAO એ યુએસ સ્ટેટ ડિપાર્ટમેન્ટને ભલામણ કરી છે કે તેઓ સતત સ્ટાફિંગ કવાયત હાથ ધરે જેથી વધતી માંગ અનુસાર અધિકારીઓની યોગ્ય ફાળવણી કરી શકાય અને ભારતીય અરજદારોને પડતી મુશ્કેલીઓમાંથી મુક્તિ અપાવી શકાય.