બર્ગામો:ઇટાલીના ઉત્તરી ભાગમાં આવેલા શાંત ગણાતા બર્ગામો પ્રાંતમાં બૈસાખીના પવિત્ર પર્વની ઉજવણી માતમમાં ફેરવાઈ ગઈ છે. કોવો વિસ્તારમાં આવેલા ગુરુદ્વારા માતા સાહિબ કૌર જીની નજીક એક વેરહાઉસ પાસે મોડી રાત્રે કંપારી છૂટી જાય તેવી હિંસાની ઘટના બની હતી. વેરહાઉસમાં આયોજિત ધાર્મિક સભા અને લંગર પૂર્ણ કરીને જ્યારે બે ભારતીય નાગરિકો બહાર નીકળી રહ્યા હતા, ત્યારે જ ઓચિંતા ધસી આવેલા એક સશસ્ત્ર હુમલાખોરે તેમના પર ગોળીઓનો વરસાદ કરી દીધો હતો. આ લોહિયાળ હુમલામાં બંને ભારતીયોના ઘટનાસ્થળે જ પ્રાણ પંખેરુ ઉડી ગયા હતા અને હુમલાખોર પોતાની કારમાં સવાર થઈને અંધારાનો લાભ લઈ પલાયન થઈ ગયો હતો.

સ્થાનિક પોલીસના સત્તાવાર અહેવાલ મુજબ, આ હુમલામાં જીવ ગુમાવનાર કમનસીબ નાગરિકોની ઓળખ 48 વર્ષીય રાગિન્દર સિંહ અને 48 વર્ષીય ગુરમીત સિંહ તરીકે થઈ છે. રાગિન્દર સિંહ સ્થાનિક કોવો વિસ્તારના જ વતની હતા, જ્યારે ગુરમીત સિંહ અગ્નાડેલોથી આ ધાર્મિક મહોત્સવમાં હાજરી આપવા આવ્યા હતા. હુમલાખોરની ક્રૂરતા જોઈને પોલીસને પ્રાથમિક દ્રષ્ટિએ આ કોઈ આકસ્મિક ઝઘડો નહીં પરંતુ પૂર્વ આયોજિત કાવતરું હોવાની પ્રબળ શંકા છે. ઘટનાના પગલે સમગ્ર વિસ્તારને સીલ કરી દેવામાં આવ્યો છે અને ઇટાલિયન સુરક્ષા એજન્સીઓએ સીસીટીવી ફૂટેજ તેમજ ટેકનિકલ સર્વેલન્સની મદદથી હત્યારાને પકડવા માટે ચક્રો ગતિમાન કર્યા છે.

બૈસાખી જેવા હર્ષોલ્લાસના તહેવાર દરમિયાન બનેલી આ ઘટનાથી ઇટાલીમાં વસતા ભારતીય સમુદાયમાં ઘેરા શોકની લાગણી સાથે સુરક્ષાને લઈને ગંભીર ચિંતા પ્રસરી ગઈ છે. વિદેશની ધરતી પર ધાર્મિક સ્થળની બિલકુલ નજીક થયેલા આ ડબલ મર્ડરે ઇન્ટરનેશનલ મીડિયામાં પણ ચકચાર મચાવી છે. ભારતીય દૂતાવાસ પણ આ મામલે ઇટાલીના વહીવટીતંત્ર સાથે સતત સંપર્કમાં છે જેથી દોષિતોને વહેલી તકે કાયદાના કટઘરામાં લાવી શકાય. હાલમાં આ હત્યા પાછળ અંગત અદાવત છે કે અન્ય કોઈ વંશીય કારણ, તે દિશામાં પોલીસ ઊંડાણપૂર્વક તપાસ ચલાવી રહી છે.