મથુરા:    વૃંદાવનના ઠાકુર બાંકે બિહારી મંદિરમાં છેલ્લા કેટલાક સમયથી ચાલતો વિવાદ હવે દેશની સર્વોચ્ચ અદાલતમાં પહોંચ્યો છે. સુપ્રીમ કોર્ટે મંદિરની ઉચ્ચ સ્તરીય સમિતિ ને કડક શબ્દોમાં પૂછ્યું છે કે, સદીઓથી ચાલી આવતી 'દેહરી પૂજા' કેમ બંધ કરવામાં આવી અને દર્શનના પવિત્ર સમયમાં ફેરફાર કરવાની જરૂર કેમ પડી? જસ્ટિસ સૂર્યકાંત અને જસ્ટિસ જોયમલ્યા બાગચીની બેન્ચે આ મામલે ગંભીર નોંધ લેતા જણાવ્યું હતું કે, ધાર્મિક પરંપરાઓ સાથે કોઈપણ પ્રકારના 'માળખાકીય ફેરફાર' સ્વીકાર્ય નથી. સમિતિ સામે લગાવવામાં આવેલા આરોપો મુજબ, હાઈ-પાવર કમિટી મંદિરની આવશ્યક ધાર્મિક પ્રથાઓમાં બિનજરૂરી દખલ કરી રહી છે, જેના કારણે પરંપરાગત પૂજા પદ્ધતિ ખોરવાઈ રહી છે.

સેવાયત ગોસ્વામીઓ વતી રજૂઆત કરતા વકીલોએ કોર્ટમાં જણાવ્યું હતું કે, બાંકે બિહારી મંદિરમાં સવાર અને સાંજની આરતી તેમજ દર્શનનો સમય માત્ર શિડ્યુલ નથી, પરંતુ તે દેવતાના જાગવા અને આરામ કરવાના વિધિ-વિધાન સાથે જોડાયેલું છે. આ પરંપરાઓ ઋતુ પ્રમાણે અને સદીઓ જૂના નિયમો મુજબ ચાલે છે. સપ્ટેમ્બર 2025 માં સમિતિ દ્વારા કરવામાં આવેલા ફેરફારોને કારણે આ આંતરિક પૂજામાં વિક્ષેપ પડ્યો છે. ખાસ કરીને 'દેહરી પૂજા', જે મંદિર બંધ હોય ત્યારે માત્ર ગુરુ-શિષ્ય પરંપરા હેઠળ ગોસ્વામીઓ દ્વારા કરવામાં આવતી હતી, તેને બંધ કરી દેવાતા ભક્તો અને સેવાયતોમાં ભારે રોષ જોવા મળી રહ્યો છે. અરજીમાં એવો પણ આક્ષેપ છે કે ભીડ વ્યવસ્થાપનના નામે ધાર્મિક વિધિઓને નિશાન બનાવવામાં આવી રહી છે.

વધુમાં, કોર્ટે 'ફૂલ બંગલા' સેવા માટે વસૂલવામાં આવતી અતિશય ફી અને શ્રીમંત ભક્તો દ્વારા મોટી રકમ આપીને કરવામાં આવતી 'વિશેષ પૂજા' અંગે પણ ચિંતા વ્યક્ત કરી હતી. અગાઉની સુનાવણીમાં કોર્ટે ટકોર કરી હતી કે પૈસાના જોરે દેવતાના આરામના સમયમાં ખલેલ પહોંચાડવી એ અયોગ્ય છે. સમિતિને હવે એક અઠવાડિયામાં પોતાનો પક્ષ રજૂ કરવા આદેશ આપવામાં આવ્યો છે અને આ કેસની આગામી સુનાવણી 26 મેના રોજ નક્કી કરવામાં આવી છે. આ વિવાદ માત્ર સમયનો નથી, પરંતુ મંદિરની સ્થાપના કાળથી ચાલી આવતી અતૂટ શ્રદ્ધા અને આધુનિક વ્યવસ્થાપન વચ્ચેના સંઘર્ષનો છે, જેના પર હવે સમગ્ર દેશના કૃષ્ણ ભક્તોની નજર છે.