જબલપુર :મધ્યપ્રદેશના જબલપુરમાં આવેલા બરગી ડેમમાં સર્જાયેલી ક્રુઝ શિપ દુર્ઘટનાના 48 કલાક બાદ રવિવારે ગુમ થયેલા છેલ્લા બે પ્રવાસીઓના મૃતદેહ મળી આવતા સમગ્ર સર્ચ ઓપરેશન પૂર્ણ જાહેર કરવામાં આવ્યું છે. રવિવારે વહેલી સવારથી શરૂ થયેલા રેસ્ક્યુ ઓપરેશનમાં એનડીઆરએફ અને એસડીઆરએફની ટીમોને આર. કામરાજ અને તેમના 9 વર્ષીય ભત્રીજા મયુરનના મૃતદેહ ડેમમાંથી મળી આવ્યા હતા. ઓર્ડનન્સ ફેક્ટરી ખમરિયામાં કાર્યરત કામરાજ પોતાના પરિવાર અને તમિલનાડુથી આવેલા સંબંધીઓ સાથે પ્રવાસ પર ગયા હતા, ત્યારે આ અણધારી આફત ત્રાટકી હતી અને હસતો-રમતો પરિવાર ક્ષણવારમાં વિખેરાઈ ગયો હતો.

આ કરુણ દુર્ઘટનામાં અત્યાર સુધીમાં કુલ 13 લોકોએ પોતાના જીવ ગુમાવ્યા છે. અકસ્માત એટલો ભયાનક હતો કે કામરાજના પરિવારના અનેક સભ્યો મોજામાં તણાઈ ગયા હતા, જેમાંથી તેમના 10 વર્ષના પુત્રને તો બચાવી લેવાયો હતો પરંતુ નાનો પુત્ર અને અન્ય સંબંધીઓ કાળનો કોળિયો બન્યા હતા. શનિવારે આ દુર્ઘટનામાં જીવ ગુમાવનારી બે મહિલાઓના મૃતદેહ ખાસ વિમાન દ્વારા તમિલનાડુ મોકલવામાં આવ્યા હતા. પરિવારે પોતાના વતનમાં જ અંતિમ સંસ્કાર કરવાની ઈચ્છા વ્યક્ત કરતા વહીવટી તંત્ર દ્વારા વિશેષ વિમાનની વ્યવસ્થા કરવામાં આવી હતી, જે રવિવારે મળી આવેલા મૃતદેહોને પણ તેમના મૂળ વતન ત્રિચી પહોંચાડવાની કામગીરી કરશે.

રવિવારે સવારે જ્યારે કાકા-ભત્રીજાના મૃતદેહ બહાર કાઢવામાં આવ્યા ત્યારે ઘટનાસ્થળે હાજર રહેલા સંબંધીઓના આક્રંદથી વાતાવરણ અત્યંત ગમગીન બની ગયું હતું. વહીવટી તંત્ર દ્વારા ટેકનિકલ ખામીઓ છતાં પરિવારના અન્ય સભ્યોને તેમના ઘર સુધી પહોંચાડવા માટે સતત પ્રયાસો કરવામાં આવ્યા હતા. આ અકસ્માતે પ્રવાસન સ્થળો પર સુરક્ષાના ધોરણો અને ક્રુઝ સંચાલનની બેદરકારી સામે ગંભીર સવાલો ઉભા કર્યા છે. હાલમાં પોલીસે અકસ્માત અંગેનો વિગતવાર અહેવાલ તૈયાર કરી કાયદેસરની તપાસ તેજ બનાવી છે, જેથી ભવિષ્યમાં આવી મોટી જાનહાનિ અટકાવી શકાય.