નવી દિલ્હી:  દિલ્હીમાં  'ઇન્ડિયા' ગઠબંધન દ્વારા યોજાયેલી 'દિલ્હી ચલો' કૂચ અને વિરોધ પ્રદર્શન દરમિયાન એક અત્યંત અનોખો અને રમુજી નજારો જોવા મળ્યો હતો. મુખ્ય ચૂંટણી કમિશનર (CEC) જ્ઞાનેશ કુમાર વિરુદ્ધ અને મત ચોરીના વિરોધમાં કાઢવામાં આવેલી આ કૂચમાં અચાનક પ્રખ્યાત કાલ્પનિક સુપરહીરો 'બેટમેન'ની એન્ટ્રી થઈ ગઈ હતી. યુવા કોંગ્રેસના કાર્યકરોએ વિરોધ પ્રદર્શન દરમિયાન રસ્તા પર અનોખી રીતે વિરોધ નોંધાવવા માટે યુવાનો અને પ્રદર્શનકારીઓમાં બેટમેન માસ્કનું વિતરણ કર્યું હતું, જેણે સૌનું ધ્યાન ખેંચ્યું હતું.

સોશિયલ મીડિયા પર વાયરલ થયેલી તસવીરો અને વીડિયોમાં કોંગ્રેસના પૂર્વ અધ્યક્ષ અને લોકસભામાં વિપક્ષના નેતા રાહુલ ગાંધી બેટમેનનો કાળો માસ્ક હાથમાં પકડીને કેમેરા સામે પોઝ આપતા નજરે પડ્યા હતા. સોશિયલ મીડિયા હેન્ડલ 'NSUI' પર આ તસવીર શેર કરતા મસ્તીભર્યા અંદાજમાં કેપ્શન લખવામાં આવ્યું હતું કે – "બેટમેન મોડ: ચાલુ; જ્ઞાનેશ તો ગિયો". આ સિવાય કેમેરામાં એક બીજું દ્રશ્ય પણ કેદ થયું હતું જેમાં રાહુલ ગાંધી કોંગ્રેસ અધ્યક્ષ મલ્લિકાર્જુન ખડગેને પણ આ માસ્ક પહેરાવવામાં મદદ કરી રહ્યા હોય તેવું જોવા મળ્યું હતું, જેને લઈને રાજકીય કોરિડોરમાં ભારે ચર્ચા જાગી છે.

આ રમુજી અને હાઈ-વોલ્ટેજ ડ્રામા વચ્ચે વિપક્ષી ગઠબંધન દ્વારા કાનૂની લડાઈ પણ સત્તાવાર રીતે શરૂ કરી દેવામાં આવી છે. ઇન્ડિયા ગઠબંધનના ૧૧ શીર્ષસ્થ નેતાઓએ સુપ્રીમ કોર્ટમાં સત્તાવાર અરજી દાખલ કરી છે, જેમાં રાહુલ ગાંધી, મલ્લિકાર્જુન ખડગે, સમાજવાદી પાર્ટીના અખિલેશ યાદવ, આરજેડીના તેજસ્વી યાદવ અને ટીએમસીના સૌગત રોય સહિતના દિગ્ગજોના નામ અરજદાર તરીકે સામેલ છે. વિરોધ પ્રદર્શનની આ અદભુત અને હટકે શૈલીએ સોશિયલ મીડિયા પર યુવાનોમાં ભારે આકર્ષણ ઊભું કર્યું છે.