ચેન્નાઈ:  તમે લાખો રૂપિયા ખર્ચીને મોંઘામાં મોંઘું RO ફિલ્ટર લગાવ્યું હશે એ વિચારીને કે તમારું કુટુંબ સુરક્ષિત છે, પરંતુ સાચી હકીકત કંઈક અલગ જ છે. તાજેતરમાં IIT મદ્રાસ દ્વારા કરવામાં આવેલા એક ગહન અભ્યાસમાં જાણવા મળ્યું છે કે શુદ્ધ કરેલા પાણીના દર ૩ માંથી ૧ નમૂનામાં ખતરનાક E. coli બેક્ટેરિયા હાજર હતા. આશ્ચર્યની વાત એ છે કે, આ ખામી RO મશીનની નથી, પરંતુ પાણીને ફિલ્ટર કર્યા પછી તેને જે રીતે સાચવવામાં આવે છે તેની છે. લોકો અજાણતામાં જ શુદ્ધ પાણીને ડોલ, માટલા કે પ્લાસ્ટિકના કન્ટેનરમાં ભરીને તેને ફરીથી પ્રદૂષિત કરી રહ્યા છે, જે સીધું પેટની ગંભીર બીમારીઓ અને કિડનીની સમસ્યાઓને આમંત્રણ આપે છે.

સંશોધકોએ શોધી કાઢ્યું કે જ્યારે આપણે RO માંથી નીકળતા પાણીને ખુલ્લા વાસણમાં સંગ્રહ કરીએ છીએ અથવા તે વાસણને નિયમિતપણે યોગ્ય રીતે સાફ નથી કરતા, ત્યારે તેમાં બેક્ટેરિયાનું સામ્રાજ્ય સ્થપાય છે. ખાસ કરીને, જો તમે કન્ટેનરને નળના સાદા પાણીથી ધોઈને તરત જ તેમાં RO પાણી ભરો છો, તો નળના પાણીમાં રહેલા બેક્ટેરિયા શુદ્ધ પાણીમાં ભળી જાય છે. અભ્યાસમાં એક ચોંકાવનારી વિગત એ પણ સામે આવી છે કે જ્યાં શિક્ષણનું સ્તર ઓછું હતું ત્યાં પાણી દૂષિત થવાનું પ્રમાણ ૮૩ ટકા જેટલું ઊંચું હતું, જે દર્શાવે છે કે ટેકનોલોજી ગમે તેટલી સારી હોય પણ જો 'હાઈજીન' પ્રત્યે જાગૃતિ ન હોય તો બધું વ્યર્થ છે.

નિષ્ણાતો સલાહ આપે છે કે માત્ર ફિલ્ટર લગાવી દેવાથી જવાબદારી પૂરી થતી નથી. RO ના પાણીનો સંગ્રહ કરવા માટે હંમેશા એર-ટાઈટ (હવાચુસ્ત) અને સાફ કરેલા સ્ટીલના વાસણોનો ઉપયોગ કરવો જોઈએ. કન્ટેનરને દરરોજ ગરમ પાણીથી સાફ કરવું અને તેને ડાયરેક્ટ નળના પાણીના સંપર્કથી બચાવવું ખૂબ જરૂરી છે. જો તમે પણ RO નું પાણી ડોલમાં ભરીને રાખતા હોવ, તો ચેતી જજો; તમારી આ નાની બેદરકારી ફિલ્ટર પાછળ કરેલા હજારો રૂપિયાના ખર્ચને તો નકામો બનાવે જ છે, પણ સાથે સાથે તમારા સ્વાસ્થ્ય સાથે પણ મોટા પાયે ચેડાં કરે છે.