ચેન્નઈ : અભિનેત્રી અને રાજકારણી ખુશ્બૂ સુંદરે સોશિયલ મીડિયા પર બોલિવૂડ અભિનેત્રી કેટરિના કૈફના પ્રસૂતિ પછીના (પ્રેગ્નેન્સી બાદના) દેખાવને નિશાન બનાવનારા ટ્રોલ્સની આકરી ઝાટકણી કાઢી છે. સમાજમાં વ્યાપ્ત અયોગ્ય બેવડા ધોરણો સામે અવાજ ઉઠાવતા ખુશ્બૂએ સવાલ કર્યો છે કે શા માટે મહિલાઓને ઉંમર વધવા કે વજન વધવા બદલ સતત ટ્રોલ કરવામાં આવે છે, જ્યારે પુરુષોના કિસ્સામાં આ જ બાબતોને તદ્દન સામાન્ય ગણીને નજરઅંદાજ કરી દેવાય છે.

તાજેતરમાં અભિનેતા પતિ વિક્કી કૌશલ સાથે પુત્ર વિહાનના જન્મ બાદ કેટરિના કૈફ જાહેરમાં નજરે પડી હતી. આ દરમિયાન કેટલાક સોશિયલ મીડિયા ટ્રોલ્સે અભિનેત્રીના શારીરિક દેખાવ અને વજનને લઈને વાહિયાત ટીકાઓ કરી હતી અને તે પોતાના "શ્રેષ્ઠ સમય" (પ્રાઇમ) ને વટાવી ચૂકી છે તેવા સવાલો ઉઠાવ્યા હતા. આ બાબતે ખુશ્બૂ સુંદરે આક્રોશ વ્યક્ત કરતા જણાવ્યું હતું કે સ્ત્રીઓની ઉંમર અને શરીરને હંમેશાં જાણે કોઈ જાહેર ચર્ચાનો વિષય કે જાહેરાત બનાવી દેવામાં આવે છે.

પુરુષો અને મહિલાઓ માટે સમાજના અલગ માપદંડો શા માટે?

પુરુષો અને મહિલાઓ પ્રત્યેના સામાજિક દ્રષ્ટિકોણ વચ્ચેના ભેદભાવને સ્પષ્ટ કરતા ખુશ્બૂએ સોશિયલ મીડિયા પર એક મજબૂત સંદેશ પોસ્ટ કર્યો હતો. તેમણે લખ્યું કે જો કોઈ પુરુષ ટાલિયા થઈ જાય તો તેને 'વિશિષ્ટ વ્યક્તિત્વ' (ડિસ્ટિગ્વિશ્ડ) ધરાવતો ગણવામાં આવે છે, પુરુષની કમર ૪૦-ઇંચની થઈ જાય તો કોઈ પૂછતું નથી કે તેના પ્રાઈમ ટાઈમનું શું થયું, અને વાળ સફેદ થાય તો તેને 'સોલ્ટ-એન્ડ-પેપર હેન્ડસમ' તથા પરિપક્વ કહેવામાં આવે છે. પુરુષોની ઉંમર વધે તેમ તેમને અનુભવ સાથે વધુ આકર્ષક બનવાની છૂટ મળે છે, પરંતુ મહિલાઓના કિસ્સામાં દરેક કરચલી, વજનનો દરેક કિલો અને દરેક સફેદ વાળ વિવાદનો વિષય બની જાય છે.

બોડી-શેમિંગ અને ટ્રોલિંગના પોતાના અનુભવોને ટાંકીને ખુશ્બૂએ કેટરિના કૈફનું સમર્થન કર્યું હતું અને સ્પષ્ટ શબ્દોમાં કહ્યું કે કેટરિના સુંદર હતી, છે અને હંમેશા રહેશે. કોઈ પણ સ્ત્રી માટે જીવનનો કોઈ એક જ શ્રેષ્ઠ તબક્કો હોતો નથી, પરંતુ તેનું સમગ્ર જીવન અને તેની દરેક અવસ્થા સુંદર હોય છે. મહિલાઓએ માતૃત્વ કે શારીરિક ફેરફારો અંગે કોઈને પણ સ્પષ્ટતા આપવાની જરૂર નથી. ઉલ્લેખનીય છે કે કેટરિનાના સમર્થનમાં ખુશ્બૂ ઉપરાંત અગાઉ રિતિક રોશન અને અલી ઝફર જેવા દિગ્ગજ કલાકારો પણ સોશિયલ મીડિયા પર પોતાનો વિરોધ નોંધાવી ચૂક્યા છે.