બેંગકોક, તા. ૧૨: થાઈલેન્ડના જાણીતા પ્રવાસન સ્થળ ફુકેટમાં રજાઓ માણવા ગયેલા ભારતીય પ્રવાસીઓના ગ્રુપ સાથે એક હચમચાવી દે તેવી ઘટના બની છે. ફુકેટના એક કાફેમાં શુક્રવારે મોડી રાત્રે પાંચ ભારતીય મિત્રો પહોંચ્યા હતા, જેમાંથી ચાર પ્રવાસીઓ રહસ્યમય સંજોગોમાં એક પછી એક બેભાન થઈ ગયા હતા. આ ચારેયને તાત્કાલિક હોસ્પિટલમાં ખસેડવામાં આવ્યા હતા, જ્યાં સારવાર દરમિયાન એક યુવાન ભારતીય નાગરિકનું મોત નીપજ્યું છે.
શું બની હતી ઘટના?
સ્થાનિક સુરક્ષા કર્મચારીઓના જણાવ્યા અનુસાર, પાંચ ભારતીય પ્રવાસીઓનું આ ગ્રુપ શુક્રવારે રાત્રે ૧૧ વાગ્યાની આસપાસ કઠુ જિલ્લાના કમલા બીચ વિસ્તારમાં આવેલા એક કાફેમાં આવ્યું હતું. રાત્રે લગભગ ૧:૫૪ વાગ્યે, અચાનક જ તેમાંથી ચાર લોકો બેભાન થઈને જમીન પર ઢળી પડ્યા હતા. કાફેમાં હાજર લોકો અને સ્ટાફ આ દ્રશ્ય જોઈને સ્તબ્ધ થઈ ગયા હતા અને તાત્કાલિક એમ્બ્યુલન્સ બોલાવી તેમને હોસ્પિટલ પહોંચાડ્યા હતા.
ભારતીય દૂતાવાસ સતર્ક
બેંગકોક સ્થિત ભારતીય દૂતાવાસે સોશિયલ મીડિયા પ્લેટફોર્મ X પર આ ઘટના અંગે ઊંડો શોક વ્યક્ત કર્યો છે. દૂતાવાસે જણાવ્યું કે, "અમે મૃતક યુવાનના પરિવાર સાથે સતત સંપર્કમાં છીએ અને તેમને તમામ પ્રકારની જરૂરી સહાય પૂરી પાડવામાં આવી રહી છે." ભારતીય અધિકારીઓ હાલ થાઈલેન્ડની પોલીસ અને વહીવટીતંત્ર સાથે મળીને આ ઘટના પાછળના કારણોની તપાસ કરી રહ્યા છે. મૃત્યુ પાછળ કોઈ ઝેરી પદાર્થ અથવા ફૂડ પોઈઝનિંગ જેવું કારણ છે કે કેમ તે દિશામાં પણ તપાસ ચાલી રહી છે.
બાકીના ૩ પ્રવાસીઓની સ્થિતિ
હોસ્પિટલના સૂત્રોના જણાવ્યા અનુસાર, બેભાન થયેલા અન્ય ત્રણ ભારતીય નાગરિકોની હાલત હાલ સ્થિર છે અને તેઓ ડોક્ટરોની દેખરેખ હેઠળ છે. થાઈલેન્ડની પોલીસ આ મામલે કાફેના CCTV ફૂટેજ અને પ્રવાસીઓએ લીધેલા ખોરાક કે પીણાના સેમ્પલની તપાસ કરી રહી છે.
આ ઘટનાએ થાઈલેન્ડમાં પ્રવાસ કરી રહેલા ભારતીય પ્રવાસીઓમાં ચિંતા ફેલાવી છે. દૂતાવાસે તમામ પ્રવાસીઓને સતર્ક રહેવા અને કોઈપણ મુશ્કેલીના સમયે તાત્કાલિક સંપર્ક કરવા અપીલ કરી છે.