નવી દિલ્‍હી, તા.૧૩: હવાઈ મુસાફરી કરવા ઈચ્‍છતા મુસાફરો માટે માઠા સમાચાર સામે આવ્‍યા છે. ટાટા ગ્રુપના નેજા હેઠળની એર ઇન્‍ડિયાએ તેના આંતરરાષ્‍ટ્રીય નેટવર્કમાં મોટો ફેરફાર કરતા આગામી ત્રણ મહિના માટે અનેક ફ્‌લાઇટ્‍સ રદ કરવાની જાહેરાત કરી છે. ખાસ કરીને દિલ્‍હીથી શિકાગો, નેવાર્ક, સિંગાપોર અને શાંઘાઈ જેવા મહત્‍વના શહેરો માટેની ફ્‌લાઇટ્‍સ પર કાપ મુકવામાં આવ્‍યો છે. આ નિર્ણય પાછળનું મુખ્‍ય કારણ જેટ ઇંધણના ભાવમાં થયેલો અસહ્ય વધારો છે. ફેબ્રુઆરીમાં જે ઇંધણ ઼૯૯ પ્રતિ બેરલ હતું, તે મે મહિનાના અંત સુધીમાં $૧૬૨.૮૯ પર પહોંચી ગયું છે, જેના કારણે એરલાઇન માટે આ રૂટ્‍સ પર વિમાન ઉડાડવું આર્થિક રીતે નુકસાનકારક સાબિત થઈ રહ્યું છે.

વધતા ખર્ચની આ સમસ્‍યા માત્ર ઇંધણ પૂરતી મર્યાદિત નથી. પાકિસ્‍તાની એરસ્‍પેસ બંધ હોવાને કારણે એર ઇન્‍ડિયાના વિમાનોએ યુરોપ અને અમેરિકા જવા માટે લાંબો રૂટ લેવો પડે છે. આ લાંબા અંતરને કારણે માત્ર ઇંધણનો વપરાશ જ નથી વધતો, પરંતુ ક્રૂ મેમ્‍બર્સનો ખર્ચ અને મેન્‍ટેનન્‍સનો બોજ પણ વધે છે. હવે સ્‍થિતિ એવી છે કે ઉત્તર અમેરિકા જતી ફ્‌લાઇટ્‍સને વિયેના કે સ્‍ટોકહોમ જેવા શહેરોમાં ટેકનિકલ હોલ્‍ટ લેવો પડે છે. એરલાઇનના સીઇઓ કેમ્‍પબેલ વિલ્‍સને સ્‍પષ્ટ કર્યું છે કે વધતા જતા સંચાલન દબાણને કારણે ફ્‌લાઇટ્‍સની સંખ્‍યામાં ઘટાડો કર્યા વગર તેમની પાસે બીજો કોઈ વિકલ્‍પ બચ્‍યો નથી.

નિષ્‍ણાતોના મતે, આ ફ્‌લાઇટ્‍સ રદ થવાથી માત્ર મુસાફરોની હાલાકી જ નહીં વધે, પરંતુ ટિકિટના ભાવમાં પણ ૨૦% થી ૩૦% સુધીનો વધારો જોવા મળી શકે છે. એર ઇન્‍ડિયાએ રોજના લગભગ ૧૦૦ જેટલા ઓપરેશન્‍સમાં ઘટાડો કર્યો છે, જેની સીધી અસર સાન ફ્રાન્‍સિસ્‍કો, પેરિસ અને ટોરોન્‍ટો જેવા વ્‍યસ્‍ત રૂટ્‍સ પર પણ પડશે. જો આગામી દિવસોમાં આંતરરાષ્‍ટ્રીય બજારમાં ક્રૂડ ઓઈલના ભાવ સ્‍થિર નહીં થાય, તો એરલાઇન ઉનાળાના વેકેશનની પીક સીઝન દરમિયાન હજુ પણ મોટા કાપ મૂકી શકે છે, જે પ્રવાસન અને બિઝનેસ ટ્રાવેલ પર માઠી અસર કરી શકે છે.