ગુવાહાટી:  આસામ સરકારે બહુપત્નીત્વ (એક જ સમયે એક કરતાં વધુ પત્નીઓ રાખવાની પ્રથા) વિરુદ્ધ એક ખૂબ જ આક્રમક અને કડક વલણ અપનાવ્યું છે. રાજ્યના નાણામંત્રી જયંત મલ્લા બરુઆએ વિધાનસભામાં પોતાનું પહેલું બજેટ રજૂ કરતી વખતે એક સનસનાટીપૂર્ણ જાહેરાત કરી છે. નવા પ્રસ્તાવ મુજબ, હવેથી જે પણ પુરુષ એક કરતાં વધુ પત્નીઓ રાખશે, તેને સરકાર તરફથી મળતી કોઈપણ કલ્યાણકારી યોજનાઓનો લાભ મળશે નહીં. આ નિર્ણયથી આસામના રાજકારણ અને સમાજમાં એક નવી જ ચર્ચા છેડાઈ ગઈ છે.

સરકારે માત્ર સામાન્ય નાગરિકો જ નહીં, પરંતુ પોતાના કર્મચારીઓ પર પણ સકંજો કસ્યો છે. જો કોઈ સરકારી કર્મચારી બહુપત્નીત્વની પ્રથામાં દોષિત સાબિત થશે, તો તેને કોઈ પણ પ્રકારની દયા વગર સીધો જ નોકરીમાંથી કાઢી મૂકવામાં (બરતરફ) આવશે. આ માટે આસામ સેવાઓ (શિસ્ત અને અપીલ) નિયમો, 1964 માં કાયદાકીય સુધારો કરવાનો પ્રસ્તાવ પણ બજેટમાં મૂકી દેવામાં આવ્યો છે. આ કડક નિયમ પાછળ સરકારનો મુખ્ય હેતુ મહિલા સશક્તિકરણ, લિંગ ન્યાય અને સમાજમાં નૈતિક મૂલ્યોને પ્રોત્સાહન આપવાનો છે.

નાણામંત્રીએ સ્પષ્ટ કર્યું છે કે સરકારી યોજનાઓના પૈસા અને લાભો માત્ર જરૂરિયાતમંદ અને કાયદાનું પાલન કરનારા નાગરિકો સુધી જ પહોંચવા જોઈએ. આ ઉપરાંત, કોઈપણ ફોજદારી ગુનામાં દોષિત ઠરેલી વ્યક્તિને પણ આગામી ઓગસ્ટ મહિનાથી શરૂ થનારી ₹6,000 કરોડથી વધુના બજેટવાળી નવી ડિજિટલ કલ્યાણ યોજનાઓનો લાભ નહીં મળે. આ તમામ લાભો હવે આધાર-આધારિત પ્રમાણીકરણ અને ડિજિટલ ઇન્ફ્રાસ્ટ્રક્ચર દ્વારા સીધા જ ખાતામાં ટ્રાન્સફર કરવામાં આવશે, જેથી કોઈપણ વ્યક્તિ કાયદાથી બચી ન શકે.