લખનૌ : ઉત્તર પ્રદેશમાં આગામી વિધાનસભા ચૂંટણીને હજુ સમય બાકી છે, પરંતુ તે પહેલાં જ સત્તાધારી ભારતીય જનતા પાર્ટી (BJP) માટે રાજકીય સમીકરણો કસોટીસમાન બની રહ્યા છે. પક્ષના આંતરિક મૂલ્યાંકનમાં સામે આવ્યું છે કે ભાજપ સામે વિપક્ષી પ્રચાર ઉપરાંત ચાર મુખ્ય મોરચે મોટા પડકારો ઉભા થયા છે. જેમાં યુવા મતદારો (Gen Z) માં વધતો અસંતોષ, UGC વિવાદથી ઉપજેલો રોષ, ઉચ્ચ જ્ઞાતિઓ અને બિન-અનામત વર્ગમાં અનામત અંગેની ચિંતાઓ અને સૌથી મહત્વપૂર્ણ એવા પક્ષના બૂથ-સ્તરના કાર્યકરોમાં જોવા મળતો થાક (કેડર ફટીગ) સામેલ છે.

પ્રથમ અને મોટો પડકાર ‘જનરેશન ઝેડ’ નો છે, જેઓ રસ્તા પર વિરોધ પ્રદર્શનો કરવાને બદલે ઇન્સ્ટાગ્રામ, યુટ્યુબ અને રેડિટ જેવા સોશિયલ મીડિયા પ્લેટફોર્મ્સ પર નોકરીઓ, ભરતી પ્રક્રિયા અને UGC સંબંધિત પ્રશ્નો અંગે પોતાનો આક્રોશ વ્યક્ત કરી રહ્યા છે. આ સિવાય, UGC વિવાદને કારણે શૈક્ષણિક અને રોજગારની ચિંતાઓ વધતાં યુવાનોમાં નારાજગી જોવા મળી રહી છે. બીજી તરફ, પરંપરાગત રીતે ભાજપના મજબૂત મતદાતા ગણાતા ઉચ્ચ જ્ઞાતિના વર્ગમાં અનામત નીતિઓને લઈને અસંતોષ ઊભો થયો છે, જેને પક્ષ હવે ‘સ્વતઃ મળતો’ સપોર્ટ માનવાની ભૂલ કરી શકે તેમ નથી.

સંગઠનાત્મક દૃષ્ટિએ સૌથી ગંભીર સમસ્યા કાર્યકરોમાં વ્યાપેલો થાક અને અસંતોષ છે. પક્ષના પાયાના કાર્યકરોની ફરિયાદ છે કે નેતૃત્વ સાથે તેમનો સંપર્ક તૂટી રહ્યો છે અને "પાર્ટી સત્તામાં છે પણ કાર્યકરો સત્તામાં નથી" તેવી લાગણી અનુભવાઈ રહી છે. ભાજપનું વિશાળ ચૂંટણી તંત્ર બૂથ-સ્તરના કાર્યકરોના ઉત્સાહ પર નિર્ભર રહેતું હોવાથી આ નારાજગી ચૂંટણી સંચાલનને અસર કરી શકે છે. જોકે, ભાજપના મુખ્ય પ્રવક્તા દિનેશ પ્રતાપ સિંહે તમામ વર્ગો પક્ષની સાથે હોવાનો દાવો કર્યો છે. આ તમામ પડકારોને ધ્યાનમાં રાખીને ભાજપે રાજ્યની તમામ ૪૦૩ વિધાનસભા બેઠકો પર ધારાસભ્યો અને જનતાના મિજાજનો તાગ મેળવવા માટે ચાર તબક્કાના સર્વેક્ષણની કવાયત શરૂ કરી દીધી છે.