નવી દિલ્હી : રેલ્વે ભરતી બોર્ડ (RRB) દ્વારા સ્ટેશન માસ્ટર ભરતી (RRB સ્ટેશન માસ્ટર ભરતી 2026) માટે એક અત્યંત મહત્વપૂર્ણ નોટિફિકેશન બહાર પાડવામાં આવ્યું છે, જેમાં આ પદ માટેની પાત્રતા અને વય મર્યાદાના નિયમોમાં મોટો સુધારો કરવામાં આવ્યો છે.
બોર્ડ દ્વારા જારી કરાયેલ નવી સૂચના મુજબ, સ્ટેશન માસ્ટરની જગ્યાઓ માટેની વય મર્યાદામાં સુધારો કરવામાં આવ્યો છે. આ અગાઉ સ્ટેશન માસ્ટર પદ માટે અરજી કરનારા ઉમેદવારો માટે લઘુત્તમ વય 18 વર્ષ અને મહત્તમ વય 30 વર્ષ નક્કી કરવામાં આવી હતી, જેને હવે સુધારીને લઘુત્તમ વય 20 વર્ષ અને મહત્તમ વય 30 વર્ષ કરવામાં આવી છે.
આ ફેરફાર બાદ હવે 18 વર્ષના ઉમેદવારો આ ભરતી માટે પાત્ર રહેશે નહીં, પરંતુ જે યુવાનોએ 20 વર્ષ પૂર્ણ કર્યા હોય તેઓ જ આ નવી ભરતી પ્રક્રિયામાં ભાગ લઈ શકશે. બોર્ડ દ્વારા જણાવવામાં આવ્યું છે કે યોગ્ય ઉમેદવારો પાસેથી ઓનલાઈન અરજીઓ મેળવવાની પ્રક્રિયા ટૂંક સમયમાં જ સત્તાવાર પોર્ટલ પર શરૂ કરવામાં આવશે.
અગાઉ રેલ્વે દ્વારા સ્ટેશન માસ્ટરની ભરતી સામાન્ય રીતે RRB NTPC ગ્રેજ્યુએટ લેવલની સંયુક્ત પરીક્ષા અંતર્ગત લેવામાં આવતી હતી. જોકે, આ વર્ષથી રેલ્વે બોર્ડે સ્ટેશન માસ્ટરની પસંદગી પ્રક્રિયાને વધુ વિશિષ્ટ બનાવવા માટે તેની સ્વતંત્ર અને અલગ ભરતી પરીક્ષા યોજવાનો નિર્ણય કર્યો છે. નોટિફિકેશન જારી થતાંની સાથે જ દેશભરના લાખો સ્પર્ધાત્મક પરીક્ષાના પરીક્ષાર્થીઓમાં આ ભરતીને લઈને ભારે ઉત્સાહ જોવા મળી રહ્યો છે.