મુંબઈ : દિવંગત મહાન ઉદ્યોગપતિ રતન ટાટાના સૌથી નજીકના અને અત્યંત વિશ્વસનીય સહયોગી ગણાતા મેહલી કે. મિસ્ત્રીએ ટાટા સામ્રાજ્ય સાથે જોડાયેલી વધુ એક મોટી સંસ્થામાંથી વિદાય લેવાનો ધડાકો કર્યો છે. કોલકાતા સ્થિત જાણીતી કેન્સર હોસ્પિટલનું સંચાલન કરતા 'ટાટા મેડિકલ સેન્ટર ટ્રસ્ટ'ના ટ્રસ્ટી પદેથી મેહલી મિસ્ત્રીએ રાજીનામું આપી દીધું છે. આવતી 30 સપ્ટેમ્બરે તેમનો વર્તમાન કાર્યકાળ પૂરો થઈ રહ્યો છે, ત્યારે તેમણે આ પદ માટે ફરીથી ઉમેદવારી ન નોંધાવવાનો સ્પષ્ટ નિર્ણય લીધો છે.

મળતી વિગતો મુજબ, મેહલી મિસ્ત્રીએ ગત 15 સપ્ટેમ્બરના રોજ ટાટા મેડિકલ સેન્ટરના સીઈઓ (CEO) અરુણ પટ્ટથેયિલને એક સત્તાવાર ઈમેલ મોકલીને પોતાના નિર્ણયની જાણ કરી હતી. તેમણે ઈમેલમાં વિનંતી કરી હતી કે તેમના ટ્રસ્ટીપદનું નવીનીકરણ ન કરવાનો આ નિર્ણય સત્તાવાર રેકોર્ડ પર લેવામાં આવે. આ મહત્વપૂર્ણ ઈમેલની નકલ ટાટા ટ્રસ્ટ્સના ચેરમેન નોએલ ટાટા ઉપરાંત ટ્રસ્ટીઓ વિજય સિંહ, ડેરિયસ જે. ખંભાતા, લેહ ટાટા, માયા ટાટા અને નેવિલ ટાટાને પણ રવાના કરવામાં આવી હતી.

ટાટા મેડિકલ સેન્ટર ટ્રસ્ટ કોલકાતામાં 436 બેડની ક્ષમતા ધરાવતી અત્યાધુનિક અને બિન-લાભકારી (not-for-profit) કેન્સર હોસ્પિટલ ચલાવે છે. આ સેન્ટર ગરીબ અને સામાન્ય દર્દીઓને પરવડે તેવા ખર્ચે કેન્સર નિદાન, સારવાર, સ્ક્રીનિંગ અને પેલિયેટિવ કેર જેવી શ્રેષ્ઠ સ્વાસ્થ્ય સેવાઓ પૂરી પાડે છે.

ટાટા ગ્રુપની વિવિધ સંસ્થાઓમાંથી મેહલી મિસ્ત્રીની આ વિદાય કોઈ અચાનક બનેલી ઘટના નથી, પરંતુ છેલ્લા કેટલાક મહિનાઓથી ચાલી રહેલી એક શ્રેણીનો ભાગ છે. આ અગાઉ જુલાઈ 2026માં તેમણે 'RNT અસોસિએટ્સ પ્રાઇવેટ લિમિટેડ'ના ડિરેક્ટર પદેથી પણ રાજીનામું આપ્યું હતું. આ એ જ કંપની છે જે રતન ટાટાના ₹1,000 કરોડથી વધુ મૂલ્યના અંગત રોકાણ પોર્ટફોલિયોનું સંચાલન કરતી હતી, જેમાં ઓલા ઈલેક્ટ્રિક અને અર્બન કંપની જેવી મોટો હિસ્સો ધરાવતી બ્રાન્ડ્સ સામેલ છે.

તે સિવાય ઓક્ટોબર 2025માં 'સર દોરાબજી ટાટા ટ્રસ્ટ' અને 'સર રતન ટાટા ટ્રસ્ટ'માં પણ તેમની પુનઃનિમણૂકને મંજૂરી આપવામાં આવી નહોતી. મેહલી મિસ્ત્રીએ પોતાની આ તમામ વિદાયને રતન ટાટાના વિચારો અને ભાવનાને અનુરૂપ ગણાવી છે. તેમણે ભારપૂર્વક કહ્યું હતું કે રતન ટાટાના વિઝન પ્રત્યેની તેમની નિષ્ઠા એ સુનિશ્ચિત કરવામાં છે કે ટાટા ટ્રસ્ટ્સ કોઈ પણ પ્રકારના વિવાદોથી પર રહે અને પારદર્શિતા તથા જનહિત સાથે કાર્ય કરતું રહે.