મુંબઈ, તા.૨૪: દેશની પ્રતિષ્ઠિત શિક્ષણ સંસ્થા IIT બોમ્બેમાં બીજા વર્ષના BTech વિદ્યાર્થી સાહિલ વાકોડેના આત્મહત્યાથી થયેલા દુઃખદ અવસાન બાદ સમગ્ર કેમ્પસમાં ભારે આક્રોશ અને વિરોધ પ્રદર્શનોનો માહોલ સર્જાયો છે. વિદ્યાર્થીઓના સતત વિરોધ અને તંગ પરિસ્થિતિને ધ્યાનમાં રાખીને સંસ્થાએ ૨૬ અને ૨૭ સપ્ટેમ્બરના રોજ યોજાનારી મિડ-સેમેસ્ટર પરીક્ષાઓ મુલતવી રાખવાનો મોટો નિર્ણય લીધો છે. હવે આ પરીક્ષાઓ આવતા મહિને ૧૦ અને ૧૧ ઓક્ટોબરના રોજ લેવામાં આવશે.

સંસ્થા દ્વારા જણાવવામાં આવ્યું છે કે વિદ્યાર્થી પ્રતિનિધિઓ અને અન્ય હિતધારકો સાથે ચર્ચા-વિચારણા કર્યા બાદ પરીક્ષાઓ આગળ ધકેલવાનો નિર્ણય લેવાયો છે. આ સમયગાળા દરમિયાન એક નવી 'સ્ટાન્ડર્ડ ઓપરેટિંગ પ્રોસિજર' (SOP) તૈયાર કરવામાં આવશે, જે પરીક્ષા દરમિયાન શૈક્ષણિક ગેરરીતિ કે નકલના શંકાસ્પદ કેસોમાં નિરીક્ષકો (invigilators) માટે વિદ્યાર્થી-મૈત્રીપૂર્ણ અને સ્પષ્ટ માર્ગદર્શિકા પૂરી પાડશે. આ સુધારેલી નિયમાવલીને આખરી મંજૂરી માટે સેનેટ સમક્ષ રજૂ કરવામાં આવશે.

ઉલ્લેખનીય છે કે ૧૮ સપ્ટેમ્બરના રોજ ૨૨ વર્ષીય સાહિલ વાકોડે તેના હોસ્ટેલ રૂમમાં મૃત હાલતમાં મળી આવ્યો હતો. આરોપ છે કે પરીક્ષા ખંડમાં મોબાઈલ ફોન વાપરવા બદલ નિરીક્ષક પ્રોફેસર સૂર્યનારાયણ ડુલ્લાએ તેનો ફોન જપ્ત કર્યો હતો, જેના થોડા સમય બાદ તેણે આ ખૌફનાક પગલું ભર્યું હતું. જોકે સાહિલના પરિવારે આક્ષેપ કર્યો છે કે તેને જાતિ-આધારિત ઉત્પીડનનો સામનો કરવો પડ્યો હતો. પરિણામ સ્વરૂપ, પોલીસે આત્મહત્યા માટે ઉશ્કેરણી અને એટ્રોસિટી એક્ટ હેઠળ FIR નોંધી તપાસ હાથ ધરી છે.

વિદ્યાર્થીઓના ભારે વિરોધ બાદ સંબંધિત પ્રોફેસરને તપાસ પૂર્ણ થાય ત્યાં સુધી રજા પર મોકલી દેવાયા છે અને તેમની વહીવટી જવાબદારીઓમાંથી મુક્ત કરવામાં આવ્યા છે. બીજી તરફ, IIT બોમ્બે અને તેના ફેકલ્ટી ફોરમે પ્રોફેસરનો બચાવ કરતા કહ્યું હતું કે તેમણે માત્ર નિયમોનું પાલન કર્યું હતું અને ઘટના બાદ સાહિલનું કાઉન્સેલિંગ પણ કરવામાં આવ્યું હતું. ઘટનાના મૂળ સુધી પહોંચવા માટે IIT બોમ્બેએ ૧૦ સભ્યોની ઉચ્ચ-સ્તરીય તપાસ સમિતિની પણ રચના કરી છે.