નવી દિલ્‍હી તા.૬: નાણાકીય નીતિ સમિતિ (MPC) ની બેઠક બાદ, રિઝર્વ બેંક ઓફ ઇન્‍ડિયા (RBI) ના ગવર્નર સંજય મલ્‍હોત્રાએ શહેરી સહકારી બેંકો (UCB) માટે નવા લાઇસન્‍સ આપવાની પ્રક્રિયા ફરી શરૂ કરવાની મોટી જાહેરાત કરી, જે બે દાયકાથી વધુ સમયથી અટકી પડી હતી. વધુમાં, RBI એ ગ્રામીણ સહકારી બેંકો માટે ક્રેડિટ મોનિટરિંગ નિયમોની સમીક્ષા અને લોન વ્‍યાજ દરોમાં પારદર્શિતા લાવવા માટે એકીકૃત માળખાનો પ્રસ્‍તાવ મૂક્‍યો છે.

RBI એ નીતિગત વ્‍યાજ દર, રેપો રેટ, ૫.૨૫% પર યથાવત રાખ્‍યો છે અને તેનું વલણ તટસ્‍થ રાખ્‍યું છે. વધુમાં, મજબૂત સ્‍થાનિક આર્થિક પ્રવૃત્તિને કારણે નાણાકીય વર્ષ ૨૦૨૬-૨૭ (FY27) માટે ભારતનો GDP વૃદ્ધિ દર ૬.૬% થી વધારીને ૬.૭% કરવામાં આવ્‍યો છે.

૨૦૦૪ માં, ઘણી નવી શહેરી સહકારી બેંકો નાણાકીય રીતે નબળી પડી ગયા પછી લાઇસન્‍સિંગ બંધ કરવામાં આવ્‍યું હતું. હવે, ૨૨ વર્ષ પછી, RBI નવા લાઇસન્‍સ આપવા માટે માર્ગદર્શિકા ડ્રાફટ બહાર પાડી રહી છે.

ગ્રામીણ સહકારી બેંકો માટે ક્રેડિટ મોનિટરિગ વ્‍યવસ્‍થાની સમીક્ષા કરવામાં આવી રહી છે. આ નિયમો છેલ્‍લે ૧૮ વર્ષ પહેલાં, ૨૦૦૮ માં બદલવામાં આવ્‍યા હતા. લોન પર વ્‍યાજ દર નક્કી કરવાના નિયમો તમામ નિયમનકારી સંસ્‍થાઓ માટે પ્રમાણિત કરવામાં આવશે, જે ગ્રાહકો માટે પારદર્શિતા અને સુરક્ષા વધારશે.

RBI ગવર્નરના મતે, ૨૦૦૪ ની તુલનામાં બેંકિગ વાતાવરણમાં નોંધપાત્ર ફેરફારો થયા છે, અને સહકારી બેંકિગ ક્ષેત્ર નોંધપાત્ર રીતે મજબૂત બન્‍યું છે. હાલમાં, ભારતમાં ૧,૪૫૭ શહેરી સહકારી બેંકો કાર્યરત છે. નવા લાઇસન્‍સ જારી કરવાથી દેશભરના નાના શહેરો અને નગરોમાં નાણાકીય સમાવેશને વધુ વેગ મળશે.