લંડન : બ્રિટનના શાહી પરિવારમાં લાંબા સમયથી ચાલી રહેલો પારિવારિક કલેહ અને હાઈ-વોલ્ટેજ ડ્રામા હવે એક નવો વળાંક લેવા જઈ રહ્યો છે. પોતાના પરિવાર અને રાજવી પદવીઓથી દૂરી બનાવી ચૂકેલા પ્રિન્સ હેરી અને તેમની પત્ની મેઘન માર્કલ આગામી મહિનામાં બ્રિટન પરત ફરી રહ્યા છે. આ મુલાકાત દરમિયાન વર્ષોથી અલગ રહી રહેલા પિતા કિંગ ચાર્લ્સ III પોતાના પુત્ર અને પુત્રવધૂને ગળે લગાવવા અને તમામ મતભેદો ભૂલી જવા તૈયાર થયા છે. જોકે, કિંગ ચાર્લ્સના આ અણધાર્યા નિર્ણયથી શાહી મહેમાનગતિના આંતરિક વર્તુળોમાં ભારે અસંતોષ ફેલાયો છે અને પરિવારના ત્રણ મુખ્ય સભ્યો આ પુનઃમિલનથી અત્યંત નાખુશ હોવાના અહેવાલ છે.

કિંગ ચાર્લ્સે દિલ મોટું કર્યું, મહેલમાં ઉતારાની આપી ઓફર

મળતી વિગતો અનુસાર, પ્રિન્સ હેરી અને મેઘન માર્કલ આવતા મહિને બર્મિંગહામમાં યોજાનારી 'ઇન્વિક્ટસ ગેમ્સ ૨૦૨૭' (Invictus Games 2027) ના એક વર્ષના કાઉન્ટડાઉન લોન્ચિંગ પ્રોગ્રામ માટે યુકે આવી રહ્યા છે. આ મુલાકાતને ઐતિહાસિક બનાવવા માટે કિંગ ચાર્લ્સે પોતે પહેલ કરી છે. તેમણે હેરી અને મેઘનને માત્ર મળવાની મંજૂરી જ નથી આપી, પરંતુ બ્રિટન રોકાણ દરમિયાન તેમને શાહી મહેલમાં રહેવા માટે ખાસ રૂમની ઓફર પણ કરી છે. તાજેતરના ઈતિહાસમાં આ સૌથી પ્રતિષ્ઠિત અને ભાવુક ક્ષણ માનવામાં આવી રહી છે.

આ નિર્ણયથી નારાજ ત્રણ મોટા શાહી ચહેરા:

અંદરની વિગતો મુજબ, રાજાના આ પ્રેમાળ વલણથી શાહી પરિવારના જે ત્રણ સભ્યો સૌથી વધુ નારાજ અને અકળાયેલા છે, તેમના નામ આ પ્રમાણે છે:

·         રાણી કેમિલા (Queen Camilla): હેરીએ પોતાના પુસ્તક 'સ્પેર' (Spare) માં કેમિલાને ખલનાયક તરીકે રજૂ કર્યા હોવાથી કેમિલા આ દંપતીને માફ કરવાના મૂડમાં નથી.

·         પ્રિન્સ વિલિયમ (Prince William): હેરીના મોટા ભાઈ વિલિયમ પરિવારની બદનામીને કારણે હેરીથી સખત નારાજ છે.

·         કેથરિન - કેટ મિડલટન (Catherine - Kate Middleton): વિલિયમની પત્ની અને ભવિષ્યની રાણી કેટ પણ આ જોડાણની વિરુદ્ધ હોવાનું ચર્ચાઈ રહ્યું છે.

બાયોગ્રાફીમાં રાણી કેમિલાની ક્રૂર ટીકાઓનો ખુલાસો

આ વિવાદ વચ્ચે સોશિયલ મીડિયા પર રાણી કેમિલાના જૂના કિસ્સાઓ પણ ભારે ટ્રેન્ડ થઈ રહ્યા છે. ક્રિસ્ટોફર એન્ડરસન દ્વારા લિખિત જીવનચરિત્ર "કેટ!" (Kate!) માં દાવો કરાયો છે કે, રાણી કેમિલા શરૂઆતમાં કેટ મિડલટનની સૌથી મોટી ટીકાકારોમાંની એક હતી. કેમિલા ઈચ્છતી ન હતી કે પ્રિન્સ વિલિયમ કેટ સાથે લગ્ન કરે, કારણ કે કેમિલાના મતે કેટ એક 'સામાન્ય' પરિવારમાંથી આવતી હતી. કેમિલાનું માનવું હતું કે બ્રિટનના ભવિષ્યના રાજાએ કોઈ શાહી અથવા ઉચ્ચ કુલીન પરિવારની કન્યા સાથે જ લગ્ન કરવા જોઈએ.

આવા ગૂંચવાયેલા સંબંધો વચ્ચે હવે જ્યારે પ્રિન્સ હેરી અને મેઘન બ્રિટનની ધરતી પર પગ મૂકશે, ત્યારે આ પુનઃમિલન શાહી તિરાડને સાંધી શકશે કે પછી વિવાદની નવી આગ સળગાવશે, તેના પર આખી દુનિયાની નજર મંડાયેલી છે.