કોલકાતા:   પશ્ચિમ બંગાળની સત્તાધારી પાર્ટી તૃણમૂલ કોંગ્રેસ હાલમાં તેના ઇતિહાસના સૌથી મોટા સંગઠનાત્મક અને નેતૃત્વ સંકટમાંથી પસાર થઈ રહી છે. પક્ષની અંદર ચાલી રહેલા આંતરિક બળવા, રાજીનામા અને ટોચના નેતાઓની ધરપકડો વચ્ચે પાયાના સ્તર (ગ્રાઉન્ડ લેવલ)ના કાર્યકરો અને નાના નેતાઓની સ્થિતિ અત્યંત દયનીય અને ચિંતાજનક બની ગઈ છે. બંગાળના નાદિયા, કૂચ બિહાર અને ઉત્તર તથા દક્ષિણ ૨૪ પરગણા જેવા મોટા જિલ્લાઓમાં કરવામાં આવેલી પૂછપરછમાં ચોંકાવનારી વાસ્તવિકતા સામે આવી છે કે, જે નેતાઓના ભરોસે કાર્યકરો વિરોધીઓ સામે લડતા હતા, તે મોટા નેતાઓ જ હવે સામાન્ય કાર્યકરોના ફોન ઉપાડવાના પણ ટાળી રહ્યા છે, જેના કારણે સમગ્ર સંગઠનમાં ભારે અજંપો અને દિશાહીનતાનો માહોલ છે.

વિવિધ જિલ્લાઓમાંથી મળતા અહેવાલો મુજબ, નાદિયા અને કૂચ બિહાર જેવા વિસ્તારોમાં ડરનું એવું વાતાવરણ છે કે બ્લોક અને ગ્રામ પંચાયત સ્તરના મોટાભાગના અગ્રણી નેતાઓ કાં તો કૂચ બિહારની બહાર જતા રહ્યા છે અથવા અંડરગ્રાઉન્ડ થઈ ગયા છે. નેતાઓ પોતાના માટે સુરક્ષિત આશ્રયસ્થાન શોધી રહ્યા છે, જ્યારે વર્ષોથી પક્ષ માટે લોહી-પરસેવો વહાવનારા નાના કાર્યકરોને રક્ષણ આપનારું કોઈ રહ્યું નથી. પૂર્વ બર્દવાન અને દક્ષિણ ૨૪ પરગણામાં તમામ સ્થાનિક સમિતિઓ વિસર્જન કરી દેવામાં આવી હોવાથી કયા નેતા પાસે કયું પદ છે તેની કોઈને ખબર નથી, અને પક્ષમાં બહુબધા આંતરિક જૂથો પડી જતાં નીચેના સ્તરના વફાદારો ભારે દબાણ હેઠળ જીવી રહ્યા છે.

આ અભૂતપૂર્વ રાજકીય વંટોળ અને સંગઠનાત્મક પતન વચ્ચે પણ એક ખાસ ટ્રેન્ડ જોવા મળી રહ્યો છે કે પાયાના કાર્યકરોનો પક્ષના વરિષ્ઠ હોદ્દેદારો પરથી ભલે વિશ્વાસ ઉઠી ગયો હોય, પરંતુ મમતા બેનર્જી (દીદી) પ્રત્યેની તેમની વફાદારી હજુ પણ અકબંધ છે. ઉત્તર ૨૪ પરગણાના પૂર્વ પ્રમુખ નિર્મલ ઘોષ સહિતના સ્થાનિક નેતાઓ દાવો કરી રહ્યા છે કે ટીએમસી એટલે માત્ર મમતા બેનર્જી અને સાચા કાર્યકરો આજે પણ તેમની સાથે જ ઉભા છે. જો કે, જે રીતે વહીવટી તંત્રના દબાણ હેઠળ સંગઠનને નબળું પાડવાના પ્રયાસો થઈ રહ્યા છે અને મોટા નેતાઓ મેદાન છોડીને ભાગી રહ્યા છે, તે જોતાં આગામી સમયમાં મમતા બેનર્જી માટે આ પાયાના સૈનિકોનો ભરોસો અને પક્ષનું અસ્તિત્વ ટકાવી રાખવું એ સૌથી મોટો પડકાર બની રહેશે.