ન્યુ યોર્ક, તા.૦૮: વૈશ્વિક મંચ પર ભારતની આર્થિક ક્ષમતાનો ડંકો વાગ્યો છે. સંયુક્ત રાષ્ટ્ર (UN) ની સંસ્થા 'યુએન ટ્રેડ એન્ડ ડેવલપમેન્ટ' (UNCTAD) દ્વારા જાહેર કરવામાં આવેલા વાર્ષિક રોકાણ અહેવાલ અનુસાર, વર્ષ ૨૦૨૫ માં ભારતમાં વિદેશી સીધા રોકાણ (FDI) નો પ્રવાહ ૪૪ ટકાના જંગી વધારા સાથે ૩૯ બિલિયન ડોલર પર પહોંચી ગયો છે. ભારતમાં આવેલા આ રેકોર્ડબ્રેક રોકાણ પાછળ વૈશ્વિક ટેક જાયન્ટ ગુગલ (Google) ની માતૃ કંપની આલ્ફાબેટ ઇન્ક. (Alphabet Inc.) નો ૧૪.૫ બિલિયન ડોલરનો વિશાળ ડેટા સેન્ટર પ્રોજેક્ટ સૌથી મોટું ચાલક બળ સાબિત થયો છે.
રિપોર્ટ અનુસાર, આ આકર્ષક રોકાણ મુખ્યત્વે બે મેગા પ્રોજેક્ટ્સ દ્વારા પ્રેરિત હતું જે બંને આંધ્રપ્રદેશ રાજ્યમાં આકાર લઈ રહ્યા છે. જેમાં આલ્ફાબેટના ડેટા સેન્ટર ઉપરાંત પોલિશ ડેવલપર હાયન્ફ્રા (Hynfra) નો ૪ બિલિયન ડોલરનો ગ્રીન હાઇડ્રોજન પ્રોજેક્ટ સામેલ છે. જોકે, સંયુક્ત રાષ્ટ્રના અહેવાલમાં ચિંતા પણ વ્યક્ત કરવામાં આવી છે કે આ વધારો વ્યાપક કોર્પોરેટ ખર્ચના બદલે માત્ર ગણતરીના મેગા પ્રોજેક્ટ્સ પર આધારિત છે, જ્યારે સ્થાનિક ખાનગી રોકાણ હજુ પણ શાંત જોવા મળ્યું છે. આ ઉપરાંત, દેશમાં નવા ગ્રીનફિલ્ડ પ્રોજેક્ટ્સનું મૂલ્ય ૩૩ ટકા ઘટીને ૭૪ બિલિયન ડોલર નોંધાયું છે, જેમાં મેન્યુફેક્ચરિંગ ક્ષેત્રે રોકાણ ઘટ્યું હોવાનું સામે આવ્યું છે. તેમ છતાં, સેવા અને ડિજિટલ ઇન્ફ્રાસ્ટ્રક્ચર ક્ષેત્ર અત્યંત મજબૂત સાબિત થયા છે, જેના ભાગરૂપે એમેઝોને પણ ભારતમાં આર્ટિફિશિયલ ઇન્ટેલિજન્સ (AI) અને ક્લાઉડ ક્ષેત્રે ૧૩ બિલિયન ડોલરના રોકાણની જાહેરાત કરી છે.
પેટ્રોલ-ડીઝલના વાહનો રાખતા ભારતીયો માટે ચિંતા: E20 ઇંધણથી એન્જિન અને માઇલેજ પર માઠી અસરનો ખતરો!
નવી દિલ્હી, તા.૦૮: ભારત સરકાર દ્વારા દેશભરના પેટ્રોલ પંપો પર ૨૦ ટકા ઇથેનોલ મિશ્રિત પેટ્રોલ (E20) ફરજિયાત બનાવવાનો નિર્ણય હવે વાહનચાલકો માટે ચર્ચા અને ચિંતાનો વિષય બન્યો છે. તાજેતરમાં સુપ્રીમ કોર્ટની સુનાવણી દરમિયાન એટર્ની જનરલે આ રોલઆઉટને એક "પ્રયોગ" તરીકે સંબોધતા સોશિયલ મીડિયા પર હોબાળો મચી ગયો છે. ઑટોમોટિવ રિસર્ચ એસોસિએશન ઑફ ઇન્ડિયા (ARAI) ના અહેવાલે પણ પુષ્ટિ કરી છે કે E20 ઇંધણ ૧ એપ્રિલ ૨૦૨૩ પહેલા બનેલા (E10 સુસંગત) વાહનોની ફ્યુઅલ હોઝ, ગાસ્કેટ અને ઓ-રિંગ્સ જેવા નોન-મેટાલીક ભાગોમાં તિરાડો અને અકાળે બગાડ પેદા કરે છે.
આ ઉપરાંત, ઇથેનોલ હાઇગ્રોસ્કોપિક (ભેજ શોષક) હોવાથી ચોમાસા દરમિયાન ટાંકીમાં પાણી જમા થતાં વાહન બંધ પડવાની અને ઇન્જેક્ટરમાં કાટ લાગવાની સમસ્યા વધી જાય છે. સૌથી મોટો ફટકો માઇલેજ પર પડ્યો છે, કારણ કે ઇથેનોલની ઓછી ઉર્જા ઘનતાને કારણે વાહનોની ઇંધણ કાર્યક્ષમતામાં ૨ થી ૬ ટકાનો ઘટાડો નોંધાયો છે. જોકે, મારુતિ સુઝુકી અને ટોયોટા જેવી કંપનીઓએ ગ્રાહકોને આશ્વાસન આપ્યું છે કે તેમના વાહનોમાં સુરક્ષા માપદંડો મજબૂત છે અને એન્જિન ફેલ થવાના વાયરલ દાવાઓ ખોટા છે.
હોર્મુઝ સામુદ્રધુનીમાં ભડકો: અમેરિકાના હુમલા બાદ ક્રૂડ ઓઇલ ૪% ઉછળી $૭૭ ને પાર
સિંગાપોર/તેહરાન, તા.૦૮: પશ્ચિમ એશિયામાં ફરી એકવાર યુદ્ધના વાદળો ઘેરાતા વૈશ્વિક ઉર્જા બજારમાં મોટો ભૂકંપ આવ્યો છે. અમેરિકા દ્વારા ઈરાનના ૮૦ થી વધુ લશ્કરી લક્ષ્યો પર ભીષણ હવાઈ હુમલા કરવામાં આવ્યા બાદ આંતરરાષ્ટ્રીય બજારમાં બ્રેન્ટ ક્રૂડ તેલના ભાવ ૪% થી વધુ ઉછળીને ૭૭.૩૬ ડોલર પ્રતિ બેરલ પર પહોંચી ગયા છે. અમેરિકાએ આ પલટાવાર ઇરાન દ્વારા વ્યૂહાત્મક જળમાર્ગમાં વ્યાપારી જહાજો પર કરાયેલા કથિત હુમલાના વિરોધમાં કર્યો છે.
આ તણાવના કારણે વિશ્વના સૌથી વ્યસ્ત ઓઇલ સપ્લાય રૂટ 'હોર્મુઝ સ્ટ્રેટ' (Hormuz Strait) માં તેલના પરિવહનમાં મોટા વિક્ષેપની આશંકા સેવાઈ રહી છે. આ વૈશ્વિક ભય વચ્ચે, સિંગાપોર અને ઇન્ડોનેશિયાએ તાત્કાલિક સંયુક્ત નિવેદન જારી કરીને એશિયાના સૌથી મહત્વપૂર્ણ માર્ગ 'મલાક્કા સ્ટ્રેટ' (Malacca Strait) ને સંપૂર્ણ સુરક્ષિત અને કોઈપણ પ્રકારના વધારાના ટ્રાન્ઝિટ ચાર્જ વગર ખુલ્લો રાખવાની વૈશ્વિક બજારોને ખાતરી આપી છે. મલાક્કા સ્ટ્રેટમાંથી વિશ્વના કુલ દરિયાઈ તેલના ૨૯% નો વેપાર થાય છે, જેથી ત્યાં કોઈ પણ પ્રકારની અસ્થિરતા વૈશ્વિક સપ્લાય ચેઇનને વેરવિખેર કરી શકે છે.