વોશિંગ્ટન: અમેરિકામાં યોજાનારી ૨૦૨૬ની મિડટર્મ (મધ્યસત્ર) ચૂંટણીઓ પૂર્વે આર્ટિફિશિયલ ઈન્ટેલિજન્સ (AI) ઉદ્યોગમાં નીતિ-નિયમો ઘડવા બાબતે ટેક જાયન્ટ્સ વચ્ચે ખુલ્લો રાજકીય જંગ શરૂ થઈ ગયો છે. વિશ્વની અગ્રણી એઆઈ કંપનીઓ એન્થ્રોપિક અને ઓપનએઆઈ હવે રાજકીય ક્ષેત્રે 'સુપર પેક્સ' (Super PACs) ના માધ્યમથી સામસામે આવી ગઈ છે. અમેરિકાના બે ભૂતપૂર્વ સાંસદો ક્રિસ સ્ટુઅર્ટ (રિપબ્લિકન-યુટાહ) અને બ્રેડ કાર્સન (ડેમોક્રેટ-ઓકલાહોમા) દ્વારા કડક એઆઈ નિયમનોનું સમર્થન કરતા ઉમેદવારોને જીતાડવા માટે બે નવા દ્વિપક્ષીય સુપર પેક્સ લોન્ચ કરવામાં આવ્યા છે. આ જૂથોનો મુખ્ય હેતુ એઆઈના બેફામ વિકાસ સામે પબ્લિક ઇન્ટરેસ્ટ એટલે કે જનહિતનું રક્ષણ કરવાનો છે.
સામે પક્ષે પબ્લિક ફર્સ્ટ એક્શન જેવા એઆઈ સુરક્ષા કેન્દ્રિત જૂથોને એન્થ્રોપિક કંપની દ્વારા ૨૦ મિલિયન ડોલરથી વધુનું માતબર ફંડિંગ પૂરું પાડવામાં આવ્યું છે. આ ફંડનો ઉપયોગ એવા લો-મેકર્સ (સાંસદો) ને વોશિંગ્ટનમાં ચૂંટવા માટે કરવામાં આવશે જેઓ એઆઈ ટેકનોલોજી પર મજબૂત કાયદાકીય મર્યાદાઓ લાદવા ઈચ્છે છે. એઆઈના કારણે ભવિષ્યમાં મોટા પાયે થનારી સંભવિત નાણાકીય નુકસાની, નોકરીઓની કપાત, માનસિક સ્વાસ્થ્ય પર થતી વિપરીત અસરો અને યુઝર્સના પ્રાઈવસી ડેટાના જોખમો અંગે આ જૂથ ચિંતા વ્યક્ત કરી રહ્યું છે. એન્થ્રોપિકના સહ-સ્થાપક જેક ક્લાર્કે પણ આ અંગે એક મોટી સુપર પેક વ્યૂહરચના પર કામ ચાલી રહ્યું હોવાનું સ્વીકાર્યું છે.
બીજી તરફ, નિયમન વિરોધી અને ઇનોવેશન ફ્રેન્ડલી નીતિઓ ધરાવતું બિગ ટેક લોબી ગ્રૂપ આ રેસમાં ઘણું આગળ ચાલી રહ્યું છે. ઓપનએઆઈના પ્રમુખ ગ્રેગ બ્રોકમેન અને તેમની પત્ની અન્ના બ્રોકમેન દ્વારા આશરે ૫૦ મિલિયન ડોલરના ફંડ સાથે 'લીડિંગ ધ ફ્યુચર' નામનું પાવરફુલ સુપર પેક લોન્ચ કરવામાં આવ્યું છે. આ પેકને અગ્રણી વેન્ચર કેપિટલ ફર્મ એન્ડ્રીસન હોરોવિટ્ઝના માર્ક એન્ડ્રીસન જેવા દિગ્ગજોનું પણ સમર્થન પ્રાપ્ત છે, જેઓ મુક્ત બજાર અને લિબર્ટેરિયન નીતિઓના પક્ષધર છે. તેમનો મુખ્ય ઉદ્દેશ્ય એવા ઉમેદવારોને પ્રોત્સાહન આપવાનો છે જેઓ એઆઈના વિકાસ માટે સરળ વાતાવરણ ઈચ્છે છે અને જેઓ કડક સરકારી નિયમો લાદવાની માંગ કરે છે તેમની સામે આક્રમક ડિજિટલ પ્રચાર ચલાવવાનો છે.
રાજકીય વિશ્લેષકોના મતે, વર્ષ ૨૦૨૫-૨૬ દરમિયાન એઆઈ કંપનીઓ દ્વારા રાજ્ય અને ફેડરલ સ્તરની ચૂંટણી ઝુંબેશોમાં આશરે ૧૫૦ મિલિયન ડોલરથી વધુનું યોગદાન આપવામાં આવ્યું છે. સુપર પેક્સ કાયદાકીય રીતે કોઈ પણ રાજકીય ઉમેદવારના સીધા પ્રચાર અભિયાન સાથે સંકલન સાધી શકતા નથી, પરંતુ તેઓ ડિજિટલ આઉટરીચ, કેનવાસિંગ, એડવર્ટાઇઝિંગ અને પોલિંગ પાછળ અમર્યાદિત નાણાં ખર્ચીને જનમત અને મતદારોના વલણને પ્રભાવિત કરવાની પ્રચંડ તાકાત ધરાવે છે. એઆઈ ક્ષેત્રની આ આંતરિક લડાઈ આગામી દિવસોમાં અમેરિકી સંસદમાં ટેકનોલોજીના ભવિષ્યને નક્કી કરનારા કાયદાઓ ઘડવામાં ખૂબ જ નિર્ણાયક ભૂમિકા ભજવશે.