લખનૌ: ઉત્તર પ્રદેશમાં રિયલ એસ્ટેટ ક્ષેત્ર આગામી દિવસોમાં નવી ઊંચાઈઓ આંબવા જઈ રહ્યું છે. ઉત્તર પ્રદેશ રિયલ એસ્ટેટ રેગ્યુલેટરી ઓથોરિટી (UP RERA) દ્વારા રાજ્યના ૬ મહત્વના જિલ્લાઓમાં ₹૨,૩૮૦.૦૪ કરોડના કુલ ૧૩ નવા રિયલ એસ્ટેટ પ્રોજેક્ટ્સને મંજૂરી આપી દેવામાં આવી છે. આ પ્રોજેક્ટ્સ પૂર્ણ થતાં જ રાજ્યમાં ૪,૭૨૪ નવા રહેણાંક અને કોમર્શિયલ યુનિટ્સ તૈયાર થશે, જેનાથી માત્ર પ્રોપર્ટી માર્કેટને જ નહીં પરંતુ નિર્માણ ક્ષેત્ર સાથે જોડાયેલા અન્ય ઉદ્યોગોને પણ મોટો વેગ મળશે.

પ્રસ્તાવિત રોકાણની દ્રષ્ટિએ બારાબંકી સૌથી આગળ રહ્યું છે, જ્યાં ₹૭૫૧.૪૨ કરોડના બે રહેણાંક પ્રોજેક્ટ્સને લીલીઝંડી અપાઈ છે, જેનાથી ૫૯૧ એકમો બનશે. યુનિટ્સની સંખ્યાની દ્રષ્ટિએ લખનૌ મોખરે છે, જ્યાં ₹૩૮૫.૭૬ કરોડના એક જ પ્રોજેક્ટ હેઠળ ૧,૩૯૨ રહેણાંક એકમો વિકસાવવામાં આવશે. આ ઉપરાંત ધાર્મિક અને સાંસ્કૃતિક નગરી વારાણસીમાં ₹૭૫૦.૨૪ કરોડના ત્રણ રહેણાંક પ્રોજેક્ટ્સને મંજૂરી મળી છે, જેમાં ૧,૧૮૯ યુનિટ્સનું નિર્માણ થશે.

 એનસીઆર (NCR) વિસ્તારમાં ગાઝિયાબાદ ખાતે ₹૨૮૬.૨૭ કરોડના ખર્ચે બે કોમર્શિયલ અને એક રહેણાંક સહિત ત્રણ પ્રોજેક્ટ્સમાં ૮૬૪ એકમો તૈયાર થશે. જ્યારે નોઈડા (ગૌતમ બુદ્ધ નગર) માં ₹૧૮૬ કરોડના રોકાણથી રહેણાંક અને વાણિજ્યિક ક્ષેત્રના ૫૬૪ યુનિટ્સ બનશે. તાજ નગરી આગ્રામાં ₹૨૦.૩૫ કરોડના બે પ્રોજેક્ટ્સ હેઠળ ૧૨૪ યુનિટ્સ બનાવવાની યોજના છે.

 UP RERA ના જણાવ્યા અનુસાર, આ મંજૂરીઓથી સિમેન્ટ, સ્ટીલ, બિલ્ડિંગ મટીરીયલ્સ, ટ્રાન્સપોર્ટેશન અને એન્જિનિયરિંગ જેવા ક્ષેત્રોમાં વ્યાપારિક પ્રવૃત્તિઓ ઝડપી બનશે. આ પ્રોજેક્ટ્સના કારણે સ્થાનિક સ્તરે પ્રત્યક્ષ અને પરોક્ષ રોજગારીની હજારો નવી તકો ઊભી થશે. ઓથોરિટીએ સ્પષ્ટ કર્યું છે કે તમામ નિર્માણ કાર્યો નિયમો અને નિર્ધારિત સમયમર્યાદામાં પારદર્શક રીતે પૂર્ણ થાય તે તેમની પ્રાથમિકતા રહેશે.