ચંદીગઢ : હરિયાણા સરકાર દ્વારા રાજ્યના શહેરી વિસ્તારોમાં વધતા વાહનોના ભારણ અને ટ્રાફિકની ટ્રાફિક જામની સમસ્યાને કાયમી ધોરણે દૂર કરવા માટે એક અત્યંત મહત્ત્વપૂર્ણ નિર્ણય લેવામાં આવ્યો છે. રાજ્યના ૧૦૦,૦૦૦ થી વધુ વસ્તી ધરાવતા તમામ શહેરો અને નગરોની બહાર નવા રિંગ રોડ તથા રાષ્ટ્રીય ધોરીમાર્ગોનું નિર્માણ કરવામાં આવશે. મુખ્યમંત્રી નાયબ સિંહ સૈનીની અધ્યક્ષતામાં મળેલી ઉચ્ચસ્તરીય બેઠકમાં આ માસ્ટરપ્લાનને સત્તાવાર મંજૂરી આપવામાં આવી છે, જેનાથી રાજ્યના માળખાકીય વિકાસને નવો વેગ મળશે.

જાહેર બાંધકામ મંત્રી રણબીર ગંગવા તથા વરિષ્ઠ અધિકારીઓની ઉપસ્થિતિમાં યોજાયેલી આ બેઠકમાં મુખ્યમંત્રીએ હિસાર બાયપાસ, કુરુક્ષેત્ર બાયપાસ, નારનૌલ શહેર બાયપાસ, જીંદ બાયપાસ અને સોહના-પલવલ બાયપાસના બાંધકામને મંજૂરી આપી દીધી છે. અંદાજે ૯,૭૦૦ કરોડ રૂપિયાના જંગી ખર્ચથી તૈયાર થનારા આ પ્રોજેક્ટ્સ હેઠળ હિસાર બાયપાસને હિસાર-રાજગઢ રોડ, એનએચ ૫૨, દિલ્હી રોડ અને કૈથલ રોડ સાથે જોડવામાં આવશે. આ ઉપરાંત, કુરુક્ષેત્ર-લાડવા બાયપાસ માટે ડીપીઆર (DPR) તૈયાર થઈ ગયો છે અને ટૂંક સમયમાં જ પ્રક્રિયા શરૂ થશે. નારનૌલ ખાતે બનનારો ૧૧ કિલોમીટર લાંબો બાયપાસ સ્ટેટ હાઈવે NH 148B સાથે જોડાશે, જ્યારે જીંદમાં આઉટર રિંગ રોડ અને NH 352 બાયપાસને ચાર-લેન તરીકે વિકસાવવામાં આવશે.

આ વિકાસયાત્રાને વધુ વેગ આપતા DND-ફરીદાબાદ-બલ્લભગઢ બાયપાસને પણ KMP લિંક સાથે જોડવા માટે વિશેષ વિકસાવવામાં આવશે, જે સીધો જેવર ઇન્ટરનેશનલ એરપોર્ટ સાથે ગ્રીનફિલ્ડ કનેક્ટિવિટી પૂરી પાડશે. આ મહત્ત્વાકાંક્ષી પ્રોજેક્ટ્સના અમલીકરણ માટે કેન્દ્ર સરકારની માર્ગદર્શિકા મુજબ એક નવી નીતિ ઘડવામાં આવશે તેમજ કેન્દ્ર સાથે ખર્ચની વહેંચણી માટે નાણા વિભાગ, જાહેર બાંધકામ વિભાગ અને શહેરી સંસ્થાઓના અધિકારીઓની એક ત્રિ-સભ્ય સમિતિની પણ રચના કરવામાં આવી છે. આ પ્રોજેક્ટ્સ પૂરા થવાથી શહેરોની અંદર ભારે વાહનોનો પ્રવેશ અટકશે અને મુસાફરોનો સમય બચવાની સાથે માર્ગ અકસ્માતોમાં પણ મોટો ઘટાડો થશે.