નવી દિલ્હી : કેન્દ્રીય કર્મચારીઓ અને પેન્શનરો જેની આતુરતાથી રાહ જોઈ રહ્યા છે તેવા આઠમા પગાર પંચ (8th Pay Commission) ને લઈને એક અત્યંત મહત્વના સમાચાર સામે આવ્યા છે. કમિશને પોતાની સત્તાવાર વેબસાઇટ પર એક નવી સૂચના બહાર પાડીને કેન્દ્ર સરકાર તથા કેન્દ્રશાસિત પ્રદેશોના કર્મચારી મંડળો, ફેડરેશનો અને યુનિયનો સાથે આગામી ચર્ચા અને બેઠકોનું નવું સમયપત્રક જાહેર કર્યું છે.
૯ અને ૧૦ જુલાઈના રોજ કોલકાતામાં યોજાયેલી બેઠકો બાદ કમિશને લગભગ બે અઠવાડિયાનો વિરામ લીધો હતો. આ દરમિયાન કમિશનની કામગીરી ધીમી પડવા અંગે કર્મચારી સંગઠનોમાં ચિંતા વ્યક્ત કરાઈ હતી, જેનો અંત લાવતા હવે નવી દિલ્હીમાં બેઠકોનો નવો તબક્કો શરૂ થવા જઈ રહ્યો છે.
ઓગસ્ટમાં દિલ્હી ખાતે યોજાશે મહત્વપૂર્ણ બેઠકો
પગાર પંચ દ્વારા જાહેર કરાયેલી માહિતી અનુસાર, આગામી ૭ અને ૧૦ ઓગસ્ટ, ૨૦૨૬ ના રોજ નવી દિલ્હી ખાતે કર્મચારી મંડળો અને વિવિધ હિસ્સેદારો સાથે ચર્ચાનો આ રાઉન્ડ યોજાશે.
આ બેઠકો દરમિયાન કર્મચારી સંગઠનો દ્વારા નીચે મુજબના મુખ્ય મુદ્દાઓ પર પોતાના સૂચનો અને માંગણીઓ રજૂ કરવામાં આવશે:
•    ફિટમેન્ટ ફેક્ટર (Fitment Factor) અને નવો પગાર સ્કેલ
•    પેન્શન સંશોધન અને ગ્રેચ્યુઇટી લાભો
•    પ્રમોશન નીતિઓ અને કાર્યકારી પરિસ્થિતિઓમાં સુધારો
૩૧ જુલાઈ સુધી એપોઇન્ટમેન્ટ લેવાની રહેશે
જે સંગઠનોએ પહેલાથી જ પોતાનું મેમોરેન્ડમ સબમિટ કરી દીધું છે પરંતુ હજુ સુધી કમિશન સમક્ષ રજૂઆત કરી શક્યા નથી, તેઓ ૩૧ જુલાઈ, ૨૦૨૬ સુધીમાં તેમના યુનિક મેમો આઈડી (Unique Memo ID) સાથે એપોઇન્ટમેન્ટ માટે વિનંતી મોકલી શકે છે.
કમિશને સ્પષ્ટતા કરી છે કે આ ચર્ચાનો અંતિમ રાઉન્ડ નથી અને આવનારા મહિનાઓમાં દિલ્હી ઉપરાંત વિવિધ રાજ્યો અને કેન્દ્રશાસિત પ્રદેશોમાં પણ આવી બેઠકો યોજાશે. ઉપરાંત, કમિશને પુનરોચ્ચાર કર્યો છે કે કોઈપણ પ્રકારની હાર્ડ કોપી કે ઈમેઈલ સ્વીકારવામાં આવશે નહીં; માત્ર તેના સત્તાવાર પોર્ટલ દ્વારા રજૂ કરાયેલ ડેટા જ ગ્રાહ્ય રાખવામાં આવશે.