નવી દિલ્હી, તા.30: જો તમે નજીકના ભવિષ્યમાં નવું ઇલેક્ટ્રિક સ્કૂટર કે બાઇક ખરીદવાનું વિચારી રહ્યા છો, તો આ સમાચાર તમારા માટે ભારે રાહત લાવ્યા છે. દેશમાં ઇલેક્ટ્રિક વાહનો (EVs) ના વપરાશને પ્રોત્સાહન આપવા માટે કેન્દ્ર સરકાર એક મોટો અને મહત્વપૂર્ણ નિર્ણય લેવા જઈ રહી છે. સૂત્રોના જણાવ્યા અનુસાર, સરકાર 'પીએમ ઇ-ડ્રાઇવ યોજના' (PM E-Drive Scheme) ને વર્ષ 2028 સુધી લંબાવવા પર ગંભીરતાથી વિચારણા કરી રહી છે.
ઉલ્લેખનીય છે કે, વર્તમાન પીએમ ઇ-ડ્રાઇવ યોજનાની મુદત 31 જુલાઈના રોજ પૂર્ણ થઈ રહી હતી, જેના કારણે ગ્રાહકો અને વાહન ઉત્પાદકોમાં સબસિડી બંધ થવા અંગે ચિંતા વ્યાપી ગઈ હતી. પરંતુ હવે સરકાર તેને 2028 સુધી લંબાવવા જઈ રહી હોવાથી ગ્રાહકોને આગામી વર્ષોમાં પણ ઇલેક્ટ્રિક ટુ-વ્હીલરની ખરીદી પર સરકારી આર્થિક સહાય મળતી રહેશે.
સૂત્રોનું માનવું છે કે સરકાર હાલના સબસિડી માળખામાં કોઈ મોટા ફેરફાર કરવાની યોજના ધરાવતી નથી. આનો અર્થ એ થયો કે ગ્રાહકોને અગાઉની જેમ જ પ્રતિ કિલોવોટ-કલાક (kWh) ₹2,500 ની સબસિડી અને પ્રતિ વાહન મહત્તમ ₹5,000 સુધીની નાણાકીય છૂટ મળતી રહેશે. જોકે, આ અંગેનો આખરી સત્તાવાર આદેશ કેબિનેટની મંજૂરી બાદ જારી કરવામાં આવશે.
આ યોજનાને 2028 સુધી સફળતાપૂર્વક ચલાવવા માટે સરકારને આશરે ₹1,000 કરોડના વધારાના બજેટની જરૂર પડશે. સરકારનું માનવું છે કે સબસિડી ચાલુ રાખવાથી દેશમાં ઇલેક્ટ્રિક વાહનોનું વેચાણ ઝડપથી વધશે, જેનાથી ક્રૂડ ઓઇલ અને પેટ્રોલ પરની નિર્ભરતા ઘટશે તેમજ શહેરોમાં વાયુ પ્રદૂષણ નિયંત્રણમાં આવશે. નોંધનીય છે કે સરકારે ઇલેક્ટ્રિક બસો અને ટ્રકો માટે આ યોજના પહેલેથી જ 2028 સુધી લંબાવી દીધી છે, અને હવે ટુ-વ્હીલર ક્ષેત્રને પણ આ જ મોટો ફાયદો મળવા જઈ રહ્યો છે.