માન્ચેસ્ટર, તા. 28: યુકેના માન્ચેસ્ટર અને તેની આસપાસના વિસ્તારોમાં રહેતા ભારતીય સમુદાય માટે રાહતના સમાચાર આવ્યા છે. માન્ચેસ્ટર સ્થિત ભારતીય કોન્સ્યુલેટ જનરલ (CGI) એ તેની સેવાઓને વધુ ઝડપી અને પારદર્શક બનાવવા માટે 'E-Seva' પોર્ટલ કાર્યરત કર્યું છે. આ નવી ડિજિટલ પહેલનો હેતુ અરજી પ્રક્રિયાને સરળ બનાવવાનો અને કોન્સ્યુલેટ પર થતી ભીડને ઘટાડવાનો છે.
કઈ સેવાઓ હવે ઓનલાઈન મળશે?
નવી વ્યવસ્થા મુજબ, પ્રવાસી ભારતીયો હવે નીચેની સેવાઓ માટે ઓનલાઈન ડોક્યુમેન્ટ અપલોડ કરી શકશે અને એપોઇન્ટમેન્ટ બુક કરી શકશે:
•    ભારતીય દસ્તાવેજોનું એટેસ્ટેશન અને યુકેના એપોસ્ટિલ્ડ ડોક્યુમેન્ટ્સની ચકાસણી.
•    વિલ (વસીયતનામું) અને ગિફ્ટ ડીડ (બક્ષિસ દસ્તાવેજ) નું એક્ઝિક્યુશન.
•    નોન-ડિફેન્સ પેન્શનરો માટે 'લાઈફ સર્ટિફિકેટ' (હયાતીના પુરાવા) મેળવવાની પ્રક્રિયા.
•    ભારતમાં રહેતા સગીર બાળકોના પાસપોર્ટ માટે જરૂરી એફિડેવિટ.
સમય અને મહેનતની થશે બચત
કોન્સ્યુલેટ દ્વારા કરવામાં આવેલી જાહેરાત મુજબ, અરજદારો હવે કોન્સ્યુલેટની મુલાકાત લેતા પહેલા ઘરે બેઠા જ પોર્ટલ પર જરૂરી ફોર્મ ભરી શકશે અને દસ્તાવેજો અપલોડ કરી શકશે. આનાથી ઓફિસ પર જઈને કરવામાં આવતા મેન્યુઅલ પેપરવર્કમાં ઘટાડો થશે અને પ્રોસેસિંગનો સમય પણ બચશે. જે લોકોને એપોઇન્ટમેન્ટ મળી હશે, તેઓ સીધા નિર્ધારિત સમયે જઈને પોતાનું કામ પતાવી શકશે, જેનાથી વેઇટિંગ લિસ્ટમાં પણ ઘટાડો થશે.
કેવી રીતે કરશો અરજી?
આ સુવિધાનો લાભ લેવા માટે અરજદારોએ માન્ચેસ્ટર કોન્સ્યુલેટની સત્તાવાર વેબસાઇટ પર આપેલી 'E-Seva' પોર્ટલની લિંક પર જવાનું રહેશે. દરેક સેવા માટે ત્યાં સ્પષ્ટ સૂચનાઓ આપવામાં આવી છે. આ ડિજિટલ પરિવર્તનથી ખાસ કરીને વૃદ્ધો અને જેઓ દૂર રહે છે તેવા ભારતીયોને ઘણી સુવિધા રહેશે. અત્યારે મર્યાદિત સેવાઓ ઓનલાઈન કરવામાં આવી છે, પરંતુ આગામી સમયમાં અન્ય કોન્સ્યુલર સેવાઓ પણ આ પ્લેટફોર્મ પર ઉમેરાય તેવી શક્યતા છે.