ચેન્નઈ : તમિલનાડુના સાહિત્યિક જગતમાં ત્યારે મોટો ભૂકંપ આવ્યો જ્યારે પુસ્તક ખરીદીમાં ગંભીર અનિયમિતતાઓ અને કથિત કૌભાંડનો પર્દાફાશ થયો. કોઈમ્બતુર ખાતે આવેલી પેરિયાર અરીવુલગમ પુસ્તકાલય માટે અગાઉની ડીએમકે સરકારના સમયમાં ખરીદવામાં આવેલી પુસ્તકોને લઈને અનેક સવાલો ઉભા થયા છે. તમિલ લેખક પેરુમાલ મુરુગને આ કૌભાંડ સામે લાવ્યા બાદ રાજ્યમાં રાજકારણ ગરમાયું છે.

પુસ્તકાલયમાં એવા પ્રકાશનકારો અને લેખકોના પુસ્તકોનો સંગ્રહ કરવામાં આવ્યો છે જેમને સાહિત્યિક વર્તુળોમાં કોઈ ઓળખતું જ નથી. સ્થિતિ ત્યારે વધુ વિચિત્ર બની જ્યારે 'તમિલનાડુ ઓરુ પારોવાઈ' નામના પુસ્તકમાં મુથુવેલુ સુબ્બૈયા અયરને વર્ષ 1947માં તમિલનાડુના પ્રથમ મુખ્યમંત્રી તરીકે દર્શાવવામાં આવ્યા, જે વાસ્તવમાં એક કાલ્પનિક પાત્ર છે. આ ઉપરાંત અન્ય એક પુસ્તકમાં અસલી સમાજ સુધારક ઈ.વી. રામાસમીના બદલે એમ.કે. રામાસમીને દ્રવિડ રાજકારણના નાયક તરીકે રજૂ કરવામાં આવ્યા છે, જે ઇતિહાસ સાથે સીધા ચેડાં સમાન છે.

જ્યારે મુખ્યમંત્રી સી જોસેફ વિજયે તાજેતરમાં આ પુસ્તકાલયનું ઉદ્ઘાટન કર્યું, ત્યારે વિપક્ષી નેતાઓ દ્વારા શ્રેય લેવાની હોડ શરૂ થઈ ગઈ હતી. મુખ્યમંત્રી વિજયે આક્રમક વલણ અપનાવતા જણાવ્યું હતું કે તમિલનાડુની જનતા પેરિયારના નામે લૂંટ ચલાવનાર ડીએમકે પાર્ટીને ક્યારેય માફ નહીં કરે. તેમણે અગાઉની સરકાર પર ભ્રષ્ટાચારના ગંભીર આરોપો લગાવ્યા છે.

લેખક પેરુમાલ મુરુગને પોતાના લેખમાં જણાવ્યું છે કે ચાર દાયકાના સાહિત્યિક અનુભવ છતાં તેમણે 'અગલ વિલાકુ પબ્લિકેશન્સ' નામની સંસ્થાનું નામ ક્યારેય સાંભળ્યું ન હતું. પુસ્તકોના ઊંચા ભાવ અને નાલદિયારને કવિ તથા દાર્શનિક ગણાવવાની ભૂલોએ વિદ્વાનોને પણ આશ્ચર્યમાં મુકી દીધા છે. કીલાડીની ઉત્ખનન અંગે પણ પુસ્તકોમાં ભ્રામક માહિતી છાપવામાં આવી છે.

વિવાદ વકરતા રાજ્યના શાળા શિક્ષણ પ્રધાને આ સમગ્ર મામલાની ઊંડી તપાસ કરાવવાની જાહેરાત કરી છે. બીજી બાજુ, ડીએમકેએ સવાલ ઉઠાવ્યો છે કે જ્યારે ટીવીકે સત્તામાં આવ્યાને છ મહિના થઈ ગયા છે અને હવે પુસ્તકોની સૂચિ તૈયાર થઈ રહી છે, ત્યારે આ કથિત કૌભાંડની વાત અત્યારે કેમ સામે આવી રહી છે.