કોલકાતા, તા.15: પશ્ચિમ બંગાળમાં સત્તા ગુમાવ્યા બાદ તૃણમૂલ કોંગ્રેસ (TMC) ની મુસીબતોનો અંત આવવાનું નામ નથી લઈ રહ્યો. પક્ષના વરિષ્ઠ નેતા અને કામરહાટીના ધારાસભ્ય મદન મિત્રાએ બુધવારે મમતા બેનર્જીના કેમ્પને મોટો ઝટકો આપતા બળવાખોર જૂથમાં સામેલ થવાની જાહેરાત કરી છે. ઋતબ્રત બેનર્જીના નેતૃત્વમાં સક્રિય આ બળવાખોર જૂથમાં મિત્રાનું જોડાવું એ 2026 વિધાનસભા ચૂંટણીમાં મળેલી કારમી હાર બાદ ટીએમસી માટે સૌથી મોટો રાજકીય પડકાર માનવામાં આવે છે.
આ નિર્ણયને લઈને ખુદ મદન મિત્રાનું નિવેદન અત્યંત સૂચક છે. તેમણે સ્પષ્ટ કર્યું છે કે તેમણે તૃણમૂલ કોંગ્રેસ છોડી નથી, પરંતુ તેમનો રાજકીય રૂમ બદલ્યો છે. તેમણે કહ્યું, "હું ટીએમસીમાં જ છું, પણ વિધાનસભામાં મારો રાજકીય રસ્તો હવે અલગ છે." તેમનું આ પગલું પાર્ટીની અંદરના નેતૃત્વ માળખા સામેના વધતા અસંતોષનું ખુલ્લું પ્રદર્શન છે. જે રીતે પક્ષ વિભાજિત થઈ રહ્યો છે તે જોતા લાગે છે કે મમતા બેનર્જીની પકડ પક્ષ પરથી ઢીલી પડી રહી છે.
આ ઘટનાનું સૌથી આશ્ચર્યજનક પાસું એ છે કે, માત્ર બે અઠવાડિયા પહેલા જ મમતા બેનર્જીએ મદન મિત્રાને પક્ષમાં 'મહાસચિવ' પદે બઢતી આપી હતી. આટલા ઉચ્ચ પદ પર હોવા છતાં, બળવાખોર જૂથમાં જવાનું તેમનું સાહસ એ સાબિત કરે છે કે પાર્ટીમાં બધું ઠીક નથી. અગાઉ ચંદ્રિમા ભટ્ટાચાર્ય દ્વારા પશ્ચિમ બંગાળ ટીએમસીના પ્રમુખ પદેથી રાજીનામું આપવાની ઘટનાએ પણ પક્ષમાં ચાલી રહેલા નેતૃત્વ સંકટને જગજાહેર કર્યું હતું.
2011 પછી પ્રથમ વખત સત્તાથી બહાર થયેલી તૃણમૂલ કોંગ્રેસ માટે મદન મિત્રાનું જવું એ એક મોટા આંચકા સમાન છે. મિત્રાએ ભાજપની પ્રચંડ લહેર વચ્ચે પણ પોતાની કમરહાટી બેઠક બચાવી રાખી હતી, જે તેમની મજબૂત પકડ સાબિત કરે છે. પશ્ચિમ બંગાળમાં ભાજપે 294 માંથી 208 બેઠકો જીતીને જે રીતે એકહથ્થુ શાસન સ્થાપ્યું છે, તેના પછી ટીએમસીમાં એક પછી એક થઈ રહેલા પક્ષપલટાએ પક્ષની એકતા પર પ્રશ્નાર્થ ચિહ્ન મૂકી દીધા છે.
રાજકીય નિષ્ણાતોનું માનવું છે કે આગામી દિવસોમાં હજુ પણ પક્ષમાં મોટા પાયે આંતરિક ઉથલપાથલ જોવા મળી શકે છે. મમતા બેનર્જી હવે કેવી રીતે પોતાના બળવાખોર નેતાઓને મનાવે છે અથવા સંગઠનમાં કેવા પરિવર્તનો લાવે છે, તેના પર સમગ્ર રાજ્યની નજર ટકેલી છે.