ઈસ્લામાબાદ:  પાકિસ્તાનનું રાજકારણ ફરી એકવાર ગંભીર કટોકટી અને આંતરિક વિવાદોના વંટોળમાં ફસાયું છે. દેશના દિગ્ગજ ધાર્મિક અને વિપક્ષી નેતા, જમિયત ઉલેમા-એ-ઇસ્લામ-ફઝલના વડા મૌલાના ફઝલુર રહેમાને વડાપ્રધાન શાહબાઝ શરીફની સરકારને સીધી "નકલી સરકાર" અને શાસકોને "શક્તિહીન" ગણાવીને મોટો રાજકીય ધડાકો કર્યો છે. પંજાબના મુલતાનમાં એક વિશાળ જાહેર સભાને સંબોધતા તેમણે દેશના વહીવટમાં સૈન્ય અને અમલદારશાહીના સતત વધી રહેલા પ્રભાવ સામે આકરા પ્રહારો કર્યા હતા. રહેમાને ચેતવણી આપતા જણાવ્યું કે સેના અને સંસ્થાઓએ પોતાની બંધારણીય મર્યાદામાં જ રહીને કામ કરવું જોઈએ, અન્યથા દેશની લોકશાહી સંપૂર્ણપણે ધ્વસ્ત થઈ જશે.

આ સમગ્ર રાજકીય સંગ્રામનું મુખ્ય કારણ ખૈબર પખ્તુનખ્વા (KPK) પ્રાંતમાં રાષ્ટ્રપતિ આસિફ અલી ઝરદારી દ્વારા લાદવામાં આવેલું ગવર્નર શાસન છે. જેલમાં બંધ પૂર્વ વડાપ્રધાન ઇમરાન ખાનની પાર્ટી પાકિસ્તાન તહરીક-એ-ઇન્સાન (PTI) ની પ્રાંતીય સરકારને હટાવીને ગવર્નર શાસન લાગુ કરવાના નિર્ણયને ફઝલુર રહેમાને લોકશાહી પર સીધો ઘા ગણાવ્યો છે. તેમણે રાષ્ટ્રપતિ ઝરદારી અને શાસક પાકિસ્તાન પીપલ્સ પાર્ટી (PPP) ની ભૂમિકા પર ગંભીર સવાલો ઉઠાવતા કહ્યું કે, પાકિસ્તાનમાં લોકશાહી અને જનપ્રતિનિધિઓની સત્તાને નબળી પાડવા પાછળ પડદા પાછળથી દોરીસંચાર કરતી શક્તિઓ કામ કરી રહી છે.

બીજી તરફ, વિપક્ષના આ આક્રમક વલણ સામે શાસક પક્ષે પણ તીખી પ્રતિક્રિયા આપી છે. પંજાબના મુખ્યમંત્રી મરિયમ નવાઝે મૌલાના રહેમાનના નિવેદનોનો આકરો વિરોધ કરતા કહ્યું કે, આર્મી ચીફ જનરલ અસીમ મુનીર અને સેના વિશે કરવામાં આવેલી ટિપ્પણીઓથી દરેક દેશભક્ત પાકિસ્તાનીનું દિલ દુભાયું છે. મરિયમે આરોપ લગાવ્યો કે રહેમાન ખૈબર પખ્તુનખ્વામાં થયેલા ભ્રષ્ટાચાર અને ગેરવહીવટના ગુનેગારોનો બચાવ કરી રહ્યા છે. સેના અને વિપક્ષ વચ્ચેના આ સીધા મુકાબલાએ પાકિસ્તાની શાસનવ્યવસ્થાની અસ્થિરતા અને શાહબાઝ સરકારના અસ્તિત્વ સામે મોટા પ્રશ્નાર્થચિહ્નો ઊભા કરી દીધા છે.