રામપુર: સમાજવાદી પાર્ટીના દિગ્ગજ નેતા આઝમ ખાનના પુત્ર અને પૂર્વ ધારાસભ્ય અબ્દુલ્લા આઝમને યુપીના બહુચર્ચિત બે પાસપોર્ટ કેસમાં એક મોટી અને મહત્વપૂર્ણ કાનૂની રાહત મળી છે. રામપુરની એમપી-એમએલએ એપેલેટ કોર્ટે આ કેસમાં નીચલી અદાલત દ્વારા ફટકારવામાં આવેલી સાત વર્ષની જેલની સજાને સંપૂર્ણપણે રદ કરી દીધી છે. અદાલતના આ આદેશ બાદ સમાજવાદી પાર્ટીના કાર્યકરો અને આઝમ પરિવારના સમર્થકોમાં ખુશીની લહેર દોડી ગઈ છે. વર્ષ ૨૦૧૯ માં ભાજપના ધારાસભ્ય આકાશ સક્સેના દ્વારા નોંધાવવામાં આવેલી ફરિયાદ મુજબ અબ્દુલ્લા પર અલગ-અલગ જન્મતારીખનો ઉપયોગ કરીને છેતરપિંડીથી બે પાસપોર્ટ મેળવવાનો અને વિદેશ પ્રવાસ કરવાનો ગંભીર આરોપ હતો, જેમાં હવે તેમને મોટી રાહત મળી છે.

આ કાનૂની વિજય છતાં અબ્દુલ્લા આઝમ માટે જેલના સળિયામાંથી બહાર આવવું હાલના તબક્કે અશક્ય લાગી રહ્યું છે. પાસપોર્ટ કેસમાં ભલે સજા રદ થઈ ગઈ હોય, પરંતુ બે પાન કાર્ડ  ધરાવવાના અન્ય એક કેસમાં આઝમ ખાન અને અબ્દુલ્લા આઝમની મુશ્કેલીઓ યથાવત છે. આ પાન કાર્ડ કેસમાં અગાઉ તેમની અપીલ ફગાવી દેવામાં આવી હતી અને રાજ્ય સરકારની અરજી પર સુનાવણી કરતા કોર્ટે ૨૩ મેના રોજ આઝમ ખાનની સજા વધારીને ૧૦ વર્ષની જેલ કરી દીધી છે. આ ઉપરાંત અન્ય ઘણા રાજકીય અને ફોજદારી કેસોમાં સજા થવાના કારણે અબ્દુલ્લાએ સુપ્રીમ કોર્ટના દ્વાર ખખડાવ્યા છે, જ્યાં હાલમાં તેમની અરજીઓ પેન્ડિંગ છે.

રાજકીય વિશ્લેષકોના મતે, રામપુરના આ હાઈપ્રોફાઈલ કેસના ચુકાદાની આગામી દિવસોમાં ઉત્તર પ્રદેશના રાજકારણ પર સીધી અસર જોવા મળશે. લાંબા સમયથી કાનૂની ગૂંચવણો અને જેલવાસ ભોગવી રહેલા આઝમ પરિવાર માટે આ ચુકાદો માનસિક રીતે બૂસ્ટર સમાન સાબિત થશે, પરંતુ પાન કાર્ડ અને અન્ય કેસોનો વજ્રઘાત હજુ પણ તેમની રાજકીય કારકિર્દી પર ગ્રહણ લગાવી રહ્યો છે. હવે જોવાનું એ રહેશે કે સુપ્રીમ કોર્ટમાં પેન્ડિંગ પડેલી અરજીઓ પર અબ્દુલ્લા આઝમને રાહત મળે છે કે પછી તેમણે હજુ લાંબો સમય જેલમાં જ વિતાવવો પડશે.