નવી દિલ્હી, તા. ૮: કેન્દ્ર સરકારે ગ્રામીણ વિસ્તારોના ઘરેલુ રસોઈ ગેસ ગ્રાહકો માટે બે સિલિન્ડર બુકિંગ વચ્ચેનો સમયગાળો ૪૫ દિવસથી ઘટાડીને ૨૫ દિવસ કર્યો છે. હવે શહેર અને ગામના તમામ ઘરેલુ ગ્રાહકો ઉપર એકસરખો ૨૫ દિવસનો નિયમ લાગુ પડશે. પેટ્રોલિયમ અને કુદરતી ગેસ રાજ્યમંત્રી સુરેશ ગોપીએ આ નિર્ણયની જાણકારી આપી હતી.

મધ્યપૂર્વમાં ફેબ્રુઆરી, ૨૦૨૬ દરમિયાન સર્જાયેલા સંઘર્ષને કારણે રસોઈ ગેસના પુરવઠા ઉપર દબાણ વધ્યું હતું. પરિસ્થિતિને સંભાળવા માટે કેન્દ્રે માર્ચમાં હંગામી માંગ-વ્યવસ્થાપનના ભાગરૂપે શહેરી વિસ્તારોમાં ૨૫ દિવસ અને ગ્રામીણ વિસ્તારોમાં ૪૫ દિવસનો બુકિંગ સમયગાળો નક્કી કર્યો હતો.

હવે દેશમાં રસોઈ ગેસનો પુરવઠો સુધર્યો છે અને બુકિંગ બાદ બાકી રહેલી સિલિન્ડરની માંગમાં નોંધપાત્ર ઘટાડો થયો છે. તેથી ગ્રામીણ ગ્રાહકો ઉપર લાગુ લાંબો સમયગાળો દૂર કરવાનો નિર્ણય લેવાયો છે.

પેટ્રોલિયમ મંત્રાલયે ઇન્ડિયન ઓઇલ કોર્પોરેશન, ભારત પેટ્રોલિયમ કોર્પોરેશન અને હિન્દુસ્તાન પેટ્રોલિયમ કોર્પોરેશન સહિતની સરકારી તેલ વિતરણ કંપનીઓને સુધારેલો નિયમ તાત્કાલિક અમલમાં મૂકવા સૂચના આપી છે. આ ફેરફાર માત્ર બુકિંગ વચ્ચેના લઘુતમ અંતર સાથે સંબંધિત છે; સિલિન્ડરની કિંમત કે સહાયમાં કોઈ ફેરફાર થયાની જાહેરાત કરવામાં આવી નથી.