નવી દિલ્હી: પશ્ચિમ એશિયામાં ચાલી રહેલા તણાવ વચ્ચે ભારત માટે અત્યંત રાહતના સમાચાર સામે આવ્યા છે. અમેરિકા અને ઈરાન વચ્ચે બે અઠવાડિયાના કામચલાઉ યુદ્ધવિરામની જાહેરાત થતાની સાથે જ વ્યૂહાત્મક રીતે મહત્વનો એવો 'હોર્મુઝની સામુદ્રધુની' (Strait of Hormuz) નો જળમાર્ગ ફરી ધમધમતો થયો છે. શિપ-ટ્રેકિંગ ડેટા અનુસાર, ભારતનો ધ્વજ ધરાવતું LPG ટેન્કર 'જગ વિક્રમ' આ ખતરનાક ગણાતા જળમાર્ગને સફળતાપૂર્વક પાર કરી ગયું છે.
યુદ્ધવિરામ બાદ પ્રથમ ભારતીય જહાજની એન્ટ્રી
મુંબઈ સ્થિત 'ગ્રેટ ઈસ્ટર્ન શિપિંગ કંપની'ની માલિકીનું 'જગ વિક્રમ' શુક્રવાર રાત અને શનિવાર સવારની વચ્ચે આ મહત્વપૂર્ણ કોરિડોરમાંથી પસાર થયું હતું. આ જહાજ લગભગ 20,000 ટન લિક્વિફાઇડ પેટ્રોલિયમ ગેસ (LPG) વહન કરી રહ્યું છે. યુદ્ધવિરામ પછી આ જળમાર્ગ પાર કરનાર આ પ્રથમ ભારતીય જહાજ છે, જે દર્શાવે છે કે હવે દરિયાઈ વેપાર ધીમે ધીમે પાટા પર આવી રહ્યો છે.
ભારતની ઉર્જા સુરક્ષા પર મોટી અસર
ભારત પોતાની જરૂરિયાતનો 88 ટકા ક્રૂડ ઓઈલ અને 90 ટકા જેટલો LPG ગલ્ફ દેશોમાંથી આયાત કરે છે. પશ્ચિમ એશિયામાં સંઘર્ષ ફાટી નીકળતા આ સપ્લાય ચેઈન ખોરવાઈ ગઈ હતી, જેના કારણે ભારતમાં હોટલ, રેસ્ટોરન્ટ અને ઉદ્યોગો માટે ગેસ પુરવઠામાં કાપ મૂકવો પડ્યો હતો. 'જગ વિક્રમ' ના સફળ પરિવહનથી હવે આશા જાગી છે કે ઘરોમાં વપરાતા રાંધણ ગેસ અને ઉદ્યોગોને મળતા પુરવઠામાં જે તંગી હતી તે ટૂંક સમયમાં દૂર થશે.
હજુ પણ અનેક જહાજો કતારમાં
જોકે, મુશ્કેલી હજુ સંપૂર્ણપણે ટળી નથી. ડેટા દર્શાવે છે કે હજુ પણ ભારતનો ધ્વજ ધરાવતા લગભગ 15 જહાજો અને સેંકડો વિદેશી ટેન્કરો આ પ્રદેશમાંથી બહાર નીકળવાની રાહ જોઈ રહ્યા છે. યુદ્ધ શરૂ થયું ત્યારે ભારતના 28 જહાજો આ જોખમી વિસ્તારમાં ફસાયેલા હતા. હવે યુદ્ધવિરામ અમલી બનતા, ભારત સરકારે ગેસ વિતરકોને પ્રાથમિકતાના ધોરણે કનેક્શન આપવા અને ઉદ્યોગોને પુરવઠો પુનઃસ્થાપિત કરવા નિર્દેશ આપ્યા છે.
આંતરરાષ્ટ્રીય બજારમાં ક્રૂડ અને ગેસના ભાવ પર પણ આ યુદ્ધવિરામની સકારાત્મક અસર જોવા મળી રહી છે. જો આ બે અઠવાડિયાનો યુદ્ધવિરામ કાયમી શાંતિમાં ફેરવાય, તો ભારત સહિત સમગ્ર વિશ્વના અર્થતંત્રને મોટી રાહત મળી શકે છે.