નવી દિલ્હી : સરકારી ટેલિકોમ કંપનીઓ અને ટેલિકોમ્યુનિકેશન વિભાગમાંથી નિવૃત્ત થયેલા સેંકડો વરિષ્ઠ નાગરિકો માટે આજે રાહતના મોટા સમાચાર આવ્યા છે. સંચાર મંત્રાલય હેઠળ કાર્યરત ‘મુખ્ય નિયંત્રક સંચાર ખાતાઓ’ (પ્રીન્સિપલ સીસીએ) ની કચેરી દ્વારા આજે દેશના પાટનગર નવી દિલ્હીમાં નાણાકીય વર્ષ ૨૦૨૬-૨૭ ના પ્રથમ ત્રિમાસિક ગાળા (ફર્સ્ટ ક્વાર્ટર) માટે એક વિશેષ ‘પેન્શન અદાલત’ નું ભવ્ય અને સફળતાપૂર્વક આયોજન કરવામાં આવ્યું હતું. આ અદાલતનો મુખ્ય ઉદ્દેશ્ય નિવૃત્ત કર્મચારીઓના લાંબા સમયથી અટકેલા પ્રશ્નોને વહેલી તકે ઉકેલવાનો હતો.

આ ખાસ પેન્શન અદાલત દરમિયાન, ભારત સંચાર નિગમ લિમિટેડ (BSNL), મહાનગર ટેલિફોન નિગમ લિમિટેડ (MTNL) અને ટેલિકોમ્યુનિકેશન વિભાગ (DoT) ના અનેક પેન્શનરો તેમજ ફેમિલી પેન્શનરોએ ભાગ લીધો હતો. આ વરિષ્ઠ નાગરિકોની વર્ષો જૂની ફરિયાદોને ખૂબ જ ગંભીરતાથી સાંભળવામાં આવી હતી અને મોટાભાગના કેસોનો સ્થળ પર જ સંતોષકારક નિકાલ કરવામાં આવ્યો હતો. જેમાં મુખ્યત્વે દર મહિને મળતા પેન્શનની નિયમિત ચુકવણી, પેન્શન કમ્યુટેશનના નાણાં, એરિયર્સ અને નિવૃત્તિ પછી મળતા અન્ય આર્થિક લાભો સંબંધિત ગૂંચવણોનો સમાવેશ થતો હતો.

વરિષ્ઠ નાગરિકોની ફરિયાદો માટેનું સૌથી અસરકારક પ્લેટફોર્મ

સંચાર મંત્રાલયે આ સફળ આયોજન અંગે સત્તાવાર નિવેદન જાહેર કરીને જણાવ્યું છે કે, પેન્શન અદાલત એ આપણા દેશના નિવૃત્ત કર્મચારીઓ અને આશ્રિત ફેમિલી પેન્શનરોની પેન્શન સંબંધિત વહીવટી કે ટેકનિકલ ફરિયાદોને તાત્કાલિક સંબોધવા માટેનું એક અત્યંત લોકપ્રિય અને અસરકારક પ્લેટફોર્મ સાબિત થયું છે. કચેરીઓના ધક્કા ખાધા વિના જ વરિષ્ઠ નાગરિકોને ન્યાય મળી રહે તે માટે આગામી સમયમાં પણ આવા પારદર્શી આયોજનો મિશન મોડમાં ચાલુ રાખવામાં આવશે, જેથી નિવૃત્ત કર્મચારીઓ પોતાનું જીવન સન્માનપૂર્વક જીવી શકે.