વોશિંગ્ટન : આર્ટિફિશિયલ ઇન્ટેલિજન્સ (AI) સેક્ટરની વિશ્વની અગ્રણી કંપની 'એનવિડિયા' (Nvidia) ના CEO જેસન હુઆંગ સાથે સંકળાયેલા એક અત્યંત ચોંકાવનારા અહેવાલે વૈશ્વિક રાજકારણ અને ટેકનોલોજી જગતમાં ભારે ખળભળાટ મચાવી દીધો છે. અમેરિકી ગુપ્તચર એજન્સીઓ દ્વારા કરવામાં આવેલા એક રિપોર્ટ અનુસાર, એનવિડિયાના વડાની નજીક રહેતી એક ચિની મહિલા બિઝનેસવુમન ચીનની ગુપ્તચર એજન્સી માટે કામ કરતી હોવાનું સામે આવ્યું છે.

પ્રાપ્ત વિગતો અનુસાર, સિંગાપોર સ્થિત ડેટા સેન્ટર કંપની 'મેગાસ્પીડ ઇન્ટરનેશનલ'ની વરિષ્ઠ અધિકારી એલિસ હુઆંગ (જેને હુઆંગ લે તરીકે પણ ઓળખવામાં આવે છે) નામના આ ચિની નાગરિકે એનવિડિયાના મુખ્ય આર્કેટેક્ટ અને CEO જેસન હુઆંગ સાથે ગાઢ સંબંધો કેળવ્યા હતા, અને આ સંબંધોની આડમાં તે અમેરિકી પ્રતિબંધોને બાયપાસ કરીને બેઇજિંગને અત્યાધુનિક AI ચિપ્સ અને સંવેદનશીલ ટેકનોલોજીની માહિતી પહોંચાડતી હતી.

ઘટનાની વિગતવાર માહિતી આપતા અહેવાલમાં જણાવવામાં આવ્યું છે કે આ ગુપ્તચર ઇનપુટ્સથી અમેરિકી વહીવટીતંત્રને લગભગ એક વર્ષ અગાઉ માહિતગાર કરવામાં આવ્યા હતા, પરંતુ યુએસ-ચાઇના વેપારી સંબંધો અને બજાર પર તેની વિપરીત અસર ન પડે તે હેતુસર તે સમયે કોઈ કડક પગલાં લેવામાં આવ્યા નહોતા. બીજી તરફ, એનવિડિયાના પ્રવક્તાએ સ્પષ્ટતા કરતા જણાવ્યું છે કે CEO દ્વારા ગ્રાહકો સાથે બેઠકો કરવી એ સામાન્ય પ્રક્રિયા છે અને કંપની આ મામલે સંપૂર્ણ તપાસ કરી રહી છે.

આ આંતરરાષ્ટ્રીય જાસૂસી કાંડ અને ટેકનોલોજી ચોરીના ઘટસ્ફોટથી આગામી સમયમાં અમેરિકા અને ચીન વચ્ચેના વેપારી સંબંધો તેમજ સેમિકન્ડક્ટર નીતિઓ પર ભારે અસર પડવાની પૂરી સંભાવના છે.