અમદાવાદ : મુંબઈમાં અભિનેતા ટાઈગર શ્રોફ પર થયેલા ગોળીબારની સનસનાટીભરી ઘટના બાદ સમગ્ર દેશમાં ફરી એકવાર ગેંગસ્ટર લોરેન્સ બિશ્નોઈનું નામ ચર્ચાના કેન્દ્રમાં આવી ગયું છે. સૌથી મોટો અને ચોંકાવનારો સવાલ એ ઉભો થઈ રહ્યો છે કે કુખ્યાત ગેંગસ્ટર લોરેન્સ બિશ્નોઈ વર્ષ ૨૦૨૩થી ગુજરાતની અત્યંત સુરક્ષિત એવી અમદાવાદની સાબરમતી સેન્ટ્રલ જેલના સળિયા પાછળ કડક સુરક્ષા હેઠળ કેદ છે, તો પછી મુંબઈમાં બનેલી આ ઘટના સાથે તેનું ગુજરાત કનેક્શન કેવી રીતે જોડાયું અને તે જેલની અંદરથી પોતાનું નેટવર્ક કેવી રીતે ચલાવી રહ્યો છે?

પ્રાપ્ત વિગતો અનુસાર, સાબરમતી જેલમાં બંધ લોરેન્સ બિશ્નોઈ પર અત્યંત કડક પ્રતિબંધો છે અને તેને અન્ય કેદીઓથી બિલકુલ અલગ રાખવામાં આવ્યો છે. તેની સાથે મુલાકાત કરવા પર સંપૂર્ણ પ્રતિબંધ છે અને માત્ર કાનૂની સહાયતા માટે તેની વકીલોની ટીમ જ તેને મળી શકે છે. તેમ છતાં, દેશના અલગ-અલગ ભાગોમાં બનતી ધમકી, ખંડણી અને ફાયરિંગ જેવી ગંભીર ઘટનાઓમાં તેની ગેંગ દ્વારા જવાબદારી સ્વીકારવામાં આવે છે. વિદેશમાં બેઠેલા તેના સાગરીતો અને સોશિયલ મીડિયા પર વાયરલ થતી પોસ્ટ્સ દ્વારા આ સિન્ડિકેટ ઓપરેટ થતી હોવાની આશંકા વ્યક્ત કરવામાં આવી રહી છે, જે હાલ પોલીસ તપાસનો મુખ્ય વિષય છે.

આ કેસમાં કાનૂની ગૂંચવણો પણ એટલી જ મોટી છે. કેન્દ્રીય ગૃહ મંત્રાલય દ્વારા ૨૦૨૩માં CrPC ની કલમ ૨૬૮ હેઠળ જારી કરવામાં આવેલા આદેશ મુજબ, લોરેન્સને કોઈપણ રાજ્યની પોલીસ સરળતાથી પોતાની કસ્ટડીમાં લઈ શકી શકે તેમ નથી. જો અન્ય કોઈ રાજ્યની પોલીસ કે મુંબઈ પોલીસ તેની પૂછપરછ કરવા માગતી હોય, તો તેમણે પહેલા કેન્દ્રીય ગૃહ મંત્રાલયની વિશેષ મંજૂરી લેવી પડશે. અગાઉ રાજસ્થાન પોલીસે સાબરમતી જેલમાં આવીને તેની પૂછપરછ કરી હતી, ત્યારે હવે ટાઈગર શ્રોફ ફાયરિંગ કેસમાં મુંબઈ પોલીસ કયા પ્રકારની કાનૂની પ્રક્રિયા અપનાવે છે અને આગળ શું ખુલાસા થાય છે તે જોવું અત્યંત રસપ્રદ રહેશે.