​નવી દિલ્હી:​ભારતને વિકસિત રાષ્ટ્ર બનાવવાની દિશામાં ખેતી અને ખેડૂતોની સમૃદ્ધિ એ પાયાની જરૂરિયાત છે, ત્યારે કેન્દ્રીય કૃષિ મંત્રી શિવરાજ સિંહ ચૌહાણે દેશના કૃષિ ક્ષેત્રમાં ક્રાંતિકારી પરિવર્તન લાવવાના ઉદ્દેશ્ય સાથે મહત્વકાંક્ષી ‘પ્રગતિ’ (Pragati) પ્રોજેક્ટનો શુભારંભ કર્યો છે. આ પરિયોજનાનો મુખ્ય ઉદ્દેશ્ય દેશના ૨૦ લાખથી વધુ ખેડૂતોને સશક્ત બનાવવાનો અને ૨૦,૦૦૦થી વધુ કૃષિ ઉદ્યમીઓને પ્રોત્સાહન આપી કૃષિ ક્ષેત્રને આધુનિક અને નફાકારક બનાવવાનો છે.

​આ પ્રોજેક્ટ અંગે વિસ્તૃત માહિતી આપતા કેન્દ્રીય મંત્રી શિવરાજ સિંહ ચૌહાણે જણાવ્યું હતું કે, “વિકસિત ભારતનું નિર્માણ ત્યારે જ શક્ય છે જ્યારે આપણા ગામડાં સમૃદ્ધ બને અને ખેડૂતો આર્થિક રીતે સધ્ધર થાય.” તેમણે ભારપૂર્વક જણાવ્યું હતું કે સરકાર ખેડૂતોની આવક વધારવા અને કૃષિ ક્ષેત્રમાં નવીનતમ ટેકનોલોજીના ઉપયોગ માટે સતત પ્રયત્નશીલ છે. સરકારના આ મિશનમાં જ્યારે અન્ય સામાજિક અને વ્યવસાયિક સંગઠનો જોડાય છે, ત્યારે વિકાસની ગતિ અનેકગણી વધી જાય છે.

​૨૬,૦૦૦ નાના કૃષિ ઉદ્યમીઓને મળશે વિશેષ તાલીમ

​આ પરિયોજનાના ભાગરૂપે સરકારે એક મહત્વનો લક્ષ્યાંક નિર્ધારિત કર્યો છે, જેના અંતર્ગત દેશભરમાંથી ૨૬,૦૦૦ નાના કૃષિ ઉદ્યમીઓની પસંદગી કરી તેમને વિશેષ તાલીમ આપવામાં આવશે. આ તાલીમ કાર્યક્રમનો મુખ્ય હેતુ નાના સ્તરે ખેતી સાથે સંકળાયેલા ઉદ્યમીઓને આધુનિક ખેતી પદ્ધતિઓ, વેલ્યુ એડિશન અને બજાર વ્યવસ્થા અંગે સજ્જ કરવાનો છે.

​આ તાલીમબદ્ધ ઉદ્યમીઓ આગળ જઈને લાખો ખેડૂતો માટે માર્ગદર્શક સાબિત થશે અને તળિયાના સ્તરે કૃષિ ઉત્પાદકતામાં વધારો કરવામાં મહત્વની ભૂમિકા ભજવશે. સરકારનું માનવું છે કે, આ પ્રકારની પહેલથી માત્ર ખેતી જ નહીં, પરંતુ ગ્રામીણ ક્ષેત્રે રોજગારીની નવી તકો પણ ઊભી થશે. આ સંપૂર્ણ પરિયોજનાનું અમલીકરણ આગામી સમયમાં ભારતીય કૃષિ ક્ષેત્રમાં એક નવી પ્રગતિશીલ ક્રાંતિ લાવશે તેવી અપેક્ષા રાખવામાં આવી રહી છે.