બુલંદશહેર, તા. 18 જૂન 2026: ઉત્તર પ્રદેશ આતંકવાદ વિરોધી ટુકડી (ATS) એ રાષ્ટ્રીય સુરક્ષાને નુકસાન પહોંચાડતા એક મોટા આંતરરાષ્ટ્રીય નેટવર્કનો પર્દાફાશ કરીને બુલંદશહેરના અકબરપુર વિસ્તારમાંથી બે શંકાસ્પદ યુવાનોની અટકાયત કરી છે. પકડાયેલા શખ્સોની ઓળખ મોહમ્મદ ઉમર અને ફૈઝાન તરીકે થઈ છે. દેશની ગુપ્તચર એજન્સીઓના હાઈ-એલર્ટ ઇનપુટ્સના આધારે, ATS આ બંને પર લાંબા સમયથી ટેકનિકલ અને ભૌતિક દેખરેખ રાખી રહી હતી. પૂરતા પુરાવા મળ્યા બાદ આખરે ઓપરેશન હાથ ધરીને બંનેને દબોચી લેવાયા છે.
પાકિસ્તાની આતંકીઓ સાથે સોશિયલ મીડિયા કનેક્શન!
ATS ની પ્રાથમિક તપાસમાં જે ખુલાસા થયા છે તે અત્યંત ચોંકાવનારા છે. આ બંને યુવાનો પાકિસ્તાનથી ઓપરેટ થતા આતંકવાદી શાહજાદ ભટ્ટી અને તેના કથિત સાથીદાર આબિદ જાટના સીધા સંપર્કમાં હોવાનો દાવો કરાયો છે. સોશિયલ મીડિયા પ્લેટફોર્મ્સ દ્વારા તેઓ પાકિસ્તાન તરફી ઝેરીલી સામગ્રી અને પ્રચાર (પ્રોપગેન્ડા) ફેલાવવાનું કામ કરતા હતા. તેમના વિદેશી આકાઓ સાથેના જોડાણના અનેક ડિજિટલ પુરાવા પણ એજન્સીના હાથે લાગ્યા છે.
૧૨,૦૦૦ રૂપિયાની લાલચે પાકિસ્તાની ગેંગસ્ટરના પોસ્ટર ચોંટાડ્યા
એજન્સીના જણાવ્યા અનુસાર, મોહમ્મદ ઉમર અને ફૈઝાન બુલંદશહેરના સ્થાનિક વિસ્તારોમાં પાકિસ્તાની ગેંગસ્ટર આબિદ જાટના પ્રચાર કરતા પોસ્ટરો ચોંટાડતા રંગેહાથ ઝડપાયા હતા. આ દેશવિરોધી કામ કરવા બદલ તેમને પાકિસ્તાન તરફથી ૧૨,૦૦૦ રૂપિયા મળવાના હતા. ATS હવે એ દિશામાં તપાસ કરી રહી છે કે શું આ માત્ર પૈસાની લાલચમાં કરાયેલી પ્રવૃત્તિ હતી કે પછી આની પાછળ સ્લીપર સેલ બનાવવાનું કોઈ મોટું આતંકી કાવતરું કે ભરતી ઝુંબેશ છુપાયેલી છે. હાલમાં તેમના મોબાઈલ ફોન અને અન્ય ઈલેક્ટ્રોનિક ડિવાઈસ ફોરેન્સિક તપાસ માટે મોકલાયા છે.
'મારો દીકરો તો ખેડૂત છે' - પરિવારે નકારી કાઢ્યા આરોપો
બીજી તરફ, પકડાયેલા બંને આરોપીઓના પરિવારે આ તમામ આરોપોને પાયાવિહોણા ગણાવ્યા છે. મોહમ્મદ ઉમરના પિતાએ દાવો કર્યો છે કે તેમનો પુત્ર માત્ર ખેતીકામ કરીને પરિવારનું ગુજરાન ચલાવે છે અને તેનો કોઈ આતંકી પ્રવૃત્તિ સાથે સંબંધ નથી. જ્યારે ફૈઝાનની માતાએ જણાવ્યું કે તેનો પુત્ર બહુ ભણેલો નથી અને તે નિર્દોષ છે.
જોકે, સ્થાનિક પૂર્વ સરપંચના જણાવ્યા મુજબ, આ બંને યુવાનો મૂળ અકબરપુરના નથી પરંતુ મઉ-ખેડા વિસ્તારમાંથી અહીં આવીને વસ્યા હતા. આ માહિતી સામે આવ્યા બાદ ATS હવે તેમના જૂના રેકોર્ડ અને ભૂતકાળની કુંડળી પણ ફંફોસી રહી છે. દેશની સુરક્ષા સાથે જોડાયેલો મામલો હોવાથી એજન્સી કોઈ કચાસ છોડવા માંગતી નથી.